ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 17 ਸਤੰਬਰ
ਦਿੱਲੀ ਦੇ ਉੱਪ ਮੁੱਖ ਮੰਤਰੀ ਮਨੀਸ਼ ਸਿਸੋਦੀਆ ਨੇ ਸ਼ਹਿਰ ਦੇ ਪੱਛਮੀ ਹਿੱਸੇ ਲਈ 29.77 ਕਰੋੜ ਰੁਪਏ ਦੇ ਸੜਕ ਪੁਨਰ ਵਿਕਾਸ ਪ੍ਰਾਜੈਕਟਾਂ ਨੂੰ ਮਨਜ਼ੂਰੀ ਦਿੱਤੀ ਹੈ। ਨਜਫਗੜ੍ਹ ਰੋਡ, ਗਾਰਡਨ ਰੋਡ, ਗਿੰਨੀ ਦੇਵੀ ਰੋਡ, ਹੇਮਵਤੀ ਨੰਦਨ ਬਹੁਗੁਣਾ ਮਾਰਗ, ਪੰਕਜ ਬੱਤਰਾ ਮਾਰਗ ਤੇ ਲਾਲ ਸਾਈਂ ਮੰਦਰ ਮਾਰਗ ਸਮੇਤ ਪੱਛਮੀ ਦਿੱਲੀ ਦੀਆਂ ਨੌਂ ਸੜਕਾਂ ਨੂੰ ਇਸ ਪ੍ਰਾਜੈਕਟ ਦੇ ਤਹਿਤ ਮਜ਼ਬੂਤ ਕੀਤਾ ਜਾਵੇਗਾ ਤੇ ਨਵੀਂ ਦਿੱਖ ਦਿੱਤੀ ਜਾਵੇਗੀ।
ਸਰਕਾਰ ਰੋਹਤਕ ਰੋਡ ’ਤੇ ਮੁੰਡਕਾ ਇੰਡਸਟੀਰੀਅਲ ਏਰੀਆ ਮੈਟਰੋ ਪਿਲਰ ਨੰਬਰ 410 ਤੋਂ 570 ਵਿਚਕਾਰ 10 ਕਿਲੋਮੀਟਰ ਦੀ ਸਰਵਿਸ ਲੇਨ ਨੂੰ ਵੀ ਮਜ਼ਬੂਤ ਕਰੇਗੀ। ਸਿਸੋਦੀਆ ਨੇ ਅਧਿਕਾਰੀਆਂ ਨੂੰ ਨਿਰਦੇਸ਼ ਦਿੱਤਾ ਕਿ ਉਹ ਯਾਤਰੀਆਂ ਨੂੰ ਅਸੁਵਿਧਾ ਤੋਂ ਬਚਣ ਲਈ ਉਸਾਰੀ ਦੇ ਕੰਮ ਦੌਰਾਨ ਸੁਰੱਖਿਆ ਨਿਯਮਾਂ ਦੀ ਪਾਲਣਾ ਕਰਵਾਉਣ। ਸਿਸੋਦੀਆ ਨੇ ਬਿਆਨ ਵਿੱਚ ਕਿਹਾ ਕਿ ਦਿੱਲੀ ਸਰਕਾਰ ਸ਼ਹਿਰ ਦੀਆਂ ਸੜਕਾਂ ਨੂੰ ਵਿਸ਼ਵ ਪੱਧਰੀ ਬਣਾਉਣ ਲਈ ਮਾਹਰਾਂ ਨਾਲ ਰਾਜਧਾਨੀ ਦੀਆਂ ਸੜਕਾਂ ਦਾ ਸਰਵੇਖਣ ਕਰ ਰਹੀ ਹੈ ਤੇ ਇਨ੍ਹਾਂ ਸੜਕਾਂ ਨੂੰ ਮਜ਼ਬੂਤ ਅਤੇ ਸੁਰੱਖਿਅਤ ਬਣਾਉਣ ਲਈ ਖਾਕਾ ਤਿਆਰ ਕਰ ਰਹੀ ਹੈ। ਪੀਡਬਲਯੂਡੀ ਇਨ੍ਹਾਂ ਸੜਕਾਂ ਦੇ ਫੁੱਟਪਾਥਾਂ, ਕੇਂਦਰੀ ਕਿਨਾਰਿਆਂ ਤੇ ਸਰਵਿਸ ਲੇਨਾਂ ਦਾ ਵੀ ਰੱਖ-ਰਖਾਅ ਕਰੇਗੀ, ਜਿਸ ਵਿੱਚ ਲੇਨ ਮਾਰਕਿੰਗ, ਪੈਰਾਪੈਟ ਦੀਆਂ ਕੰਧਾਂ ਤੇ ਰੇਲਿੰਗਾਂ ਦੀ ਸਫ਼ੈਦ ਵਾਸ਼ਿੰਗ ਸ਼ਾਮਲ ਹੈ। ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਸੜਕਾਂ ਦੇ ਮਜ਼ਬੂਤ ਹੋਣ ਨਾਲ ਆਵਾਜਾਈ ਨਿਰਵਿਘਨ ਹੋਵੇਗੀ ਤੇ ਲੋਕਾਂ ਦੇ ਆਉਣ-ਜਾਣ ਦੇ ਸਮੇਂ ਦੀ ਬੱਚਤ ਹੋਵੇਗੀ। ਸਿਸੋਦੀਆ ਨੇ ਇਹ ਵੀ ਕਿਹਾ ਕਿ ਰੋਹਤਕ ਰੋਡ ਤੋਂ ਹਰ ਰੋਜ਼ ਲੱਖਾਂ ਵਾਹਨ ਇਸ ਸੜਕ ਤੋਂ ਲੰਘਦੇ ਹਨ, ਜਿਸ ਨਾਲ ਭਾਰੀ ਟਰੈਫਿਕ ਜਾਮ ਹੁੰਦਾ ਹੈ। ਉਨ੍ਹਾਂ ਕਿਹਾ ਕਿ ਵੱਡੀ ਗਿਣਤੀ ਵਿੱਚ ਉਦਯੋਗਾਂ ਦੀ ਮੌਜੂਦਗੀ ਕਾਰਨ ਸੜਕ ਦੇ ਨਾਲ ਮੌਜੂਦਾ ਸਰਵਿਸ ਲੇਨ ਵੀ ਵਾਹਨਾਂ ਨਾਲ ਭਰੀ ਹੋਈ ਹੈ ਤੇ ਸਮੇਂ-ਸਮੇਂ ’ਤੇ ਰੱਖ-ਰਖਾਅ ਦੀ ਲੋੜ ਹੁੰਦੀ ਹੈ। ਉਦਯੋਗਾਂ ਵਿੱਚ ਕਰਮਚਾਰੀਆਂ ਦੇ ਆਉਣ-ਜਾਣ ਵਿੱਚ ਸੁਧਾਰ ਲਈ ਸਰਵਿਸ ਲੇਨ ਦਾ ਵਿਕਾਸ ਕੀਤਾ ਜਾਵੇਗਾ। ਸੜਕ ਦੀ ਮਜ਼ਬੂਤੀ ਦੇ ਪ੍ਰਾਜੈਕਟ ਵਿੱਚ ਸੜਕਾਂ ਦਾ ਫੁੱਟਪਾਥਾਂ, ਕੇਂਦਰੀ ਕਿਨਾਰਿਆਂ ਅਤੇ ਸਰਵਿਸ ਲੇਨਾਂ, ਕੇਂਦਰੀ ਕਿਨਾਰੇ ਅਤੇ ਸੜਕ ਦੇ ਦੋਵੇਂ ਪਾਸੇ ਹਰਿਆਲੀ ਦਾ ਵਿਆਪਕ ਰੱਖ-ਰਖਾਅ ਤੇ ਸੰਭਾਲ ਸ਼ਾਮਲ ਹੈ। ਸਿਸੋਦੀਆ ਨੇ ਕਿਹਾ ਕਿ ਪੈਦਲ ਚੱਲਣ ਵਾਲੇ ਰਸਤਿਆਂ ’ਤੇ ਐੱਲਈਡੀ ਲਾਈਟਾਂ ਨਾਲ ਰੱਖ-ਰਖਾਅ ਦਾ ਵੀ ਧਿਆਨ ਰੱਖਿਆ ਜਾਵੇਗਾ।
