ਸਾਹਿਤਕ ਸੰਸਥਾ ਇੰਡੋਜ਼ ਪੰਜਾਬੀ ਸਾਹਿਤ ਅਕਾਦਮੀ, ਆਸਟਰੇਲੀਆ ਵੱਲੋਂ ਸਥਾਨਕ ਇੰਡੋਜ਼ ਪੰਜਾਬੀ ਲਾਇਬ੍ਰੇਰੀ, ਇਨਾਲਾ ਵਿਖੇ ਪੰਜਾਬੀ ਲੇਖਕ, ਕਿਸਾਨ ਯੂਨੀਅਨ ਆਗੂ ਅਤੇ ਸਮਾਜ ਸੇਵੀ ਬਲਵੰਤ ਸਾਨੀਪੁਰ ਦੇ ਸਨਮਾਨ ਵਿੱਚ ਸਮਾਗਮ ਰਚਾਇਆ ਗਿਆ। ਇਸ ਵਿੱਚ ਉਨ੍ਹਾਂ ਦੀ ਕਾਵਿ ਪੁਸਤਕ ‘ਸ਼ਬਦ ਵਸੀਅਤ’ ਲੋਕ ਅਰਪਣ ਕੀਤੀ ਗਈ।
ਬਲਵੰਤ ਸਾਨੀਪੁਰ ਦਾ ਤੁਆਰਫ਼ ਕਰਵਾਉਂਦਿਆਂ ਸਰਬਜੀਤ ਸੋਹੀ ਨੇ ਦੱਸਿਆ ਕਿ ਬਲਵੰਤ ਸਾਨੀਪੁਰ ਨੇ ਜਿੱਥੇ ਵਿਚਾਰਧਾਰਕ ਤੌਰ ’ਤੇ ਚੇਤੰਨ ਹੁੰਦਿਆਂ ਕਿਸਾਨ ਸੰਘਰਸ਼ਾਂ ਵਿੱਚ ਸਦਾ ਹਿੱਸਾ ਪਾਇਆ ਹੈ, ਉੱਥੇ ਖੇਡਾਂ ਨਾਲ ਉਨ੍ਹਾਂ ਦੀ ਹਮੇਸ਼ਾਂ ਸਾਂਝ ਰਹੀ ਹੈ। ਸਮਾਜ ਦੀ ਆਰਥਿਕ ਪੱਖ ਤੋਂ ਸੇਵਾ ਕਰਦਿਆਂ ਉਹ ਕਲਮ ਰਾਹੀਂ ਵੀ ਲੋਕ ਮਸਲਿਆਂ ਬਾਰੇ ਲਿਖਦੇ ਹੋਏ ਬਿਹਤਰ ਸਮਾਜ ਦੀ ਸਿਰਜਣਾ ਲਈ ਫਿਕਰਮੰਦ ਰਹਿੰਦੇ ਹਨ। ਪੰਜਾਬ ਦੀ ਮਿੱਟੀ ਦੀ ਮਹਿਕ ਸਦਾ ਹੀ ਉਸ ਦੀਆਂ ਲਿਖਤਾਂ ਅਤੇ ਜੀਵਨਸ਼ੈਲੀ ਦਾ ਹਿੱਸਾ ਬਣੀ ਰਹਿੰਦੀ ਹੈ।
ਸਮਾਗਮ ਦੇ ਪਹਿਲੇ ਭਾਗ ਵਿੱਚ ਦਲਵੀਰ ਹਲਵਾਰਵੀ ਵੱਲੋਂ ਪਿਛਲੇ ਦਿਨੀਂ ਵਿਛੋੜਾ ਦੇ ਗਏ ਗੀਤਕਾਰ ਦੇਵ ਥਰੀਕਿਆਂ ਵਾਲੇ ਨੂੰ ਸ਼ਰਧਾ ਦੇ ਫੁੱਲ ਭੇਂਟ ਕਰਦਿਆਂ ਉਨ੍ਹਾਂ ਦੀ ਜੀਵਨ ਯਾਤਰਾ ਅਤੇ ਕਲਮੀ ਸਫ਼ਰ ਬਾਰੇ ਜਾਣਕਾਰੀ ਦਿੱਤੀ ਗਈ। ਇਸ ਉਪਰੰਤ ਹੋਏ ਕਵੀ ਦਰਬਾਰ ਵਿੱਚ ਸਰਬਜੀਤ ਸੋਹੀ, ਅਮਨਪ੍ਰੀਤ ਕੌਰ ਟੱਲੇਵਾਲ, ਇਕਬਾਲ ਸਿੰਘ ਧਾਮੀ, ਸੁਰਜੀਤ ਸੰਧੂ, ਹਰਜੀਤ ਸੰਧੂ, ਪਾਲ ਰਾਊਕੇ, ਰੁਪਿੰਦਰ ਸੋਜ਼, ਤਜਿੰਦਰ ਭੰਗੂ, ਦਲਵੀਰ ਹਲਵਾਰਵੀ, ਪੁਸ਼ਪਿੰਦਰ ਤੂਰ ਆਦਿ ਨੇ ਆਪਣੀਆਂ ਰਚਨਾਵਾਂ ਨਾਲ ਹਾਜ਼ਰੀ ਲਵਾਈ। ਅੰਤ ਵਿੱਚ ਬਲਵੰਤ ਸਾਨੀਪੁਰ ਨੇ ਆਪਣੇ ਜੀਵਨ ਪੰਧ ਦੇ ਅਹਿਮ ਮੋੜਾਂ ਅਤੇ ਜੀਵਨ ਮਨੋਰਥ ’ਤੇ ਪਹਿਰਾ ਦਿੰਦਿਆਂ ਬਿਤਾਏ ਪਲਾਂ ਨਾਲ ਸਾਂਝ ਪਵਾਈ ਅਤੇ ਇੰਡੋਜ਼ ਪੰਜਾਬੀ ਸਾਹਿਤ ਅਕਾਦਮੀ, ਆਸਟਰੇਲੀਆ ਦੁਆਰਾ ਕੀਤੇ ਜਾ ਰਹੇ ਸਾਹਿਤਕ ਕਾਰਜਾਂ ਦੀ ਸ਼ਲਾਘਾ ਕੀਤੀ। ਇਸ ਮੌਕੇ ਸ਼ਮਸ਼ੇਰ ਸਿੰਘ ਚੀਮਾਬਾਠ, ਬਿਕਰਮਜੀਤ ਸਿੰਘ ਚੰਦੀ, ਹਰਪਾਲ ਸਿੰਘ ਧੀਰੇਕੋਟ, ਦੀਪਇੰਦਰ ਸਿੰਘ, ਆਤਮਾ ਹੇਅਰ, ਜਰਨੈਲ ਸਿੰਘ ਬਾਸੀ, ਐਡਵੋਕੇਟ ਗੁਰਪ੍ਰੀਤ ਸਿੰਘ ਬੱਲ ਆਦਿ ਹਾਜ਼ਰ ਸਨ। ਸਟੇਜ ਸੈਕਟਰੀ ਦੀ ਭੂਮਿਕਾ ਰੁਪਿੰਦਰ ਸੋਜ਼ ਵੱਲੋਂ ਬਾਖੂਬੀ ਨਿਭਾਈ ਗਈ।
