ਟਾਂਡਾ (ਸੁਰਿੰਦਰ ਸਿੰਘ ਗੁਰਾਇਆ): ਦੋਆਬਾ ਕਿਸਾਨ ਕਮੇਟੀ ਵੱਲੋਂ ਚੌਲਾਂਗ ਟੌਲ ਪਲਾਜ਼ਾ ’ਤੇ ਧਰਨੇ ਦੇ 103ਵੇਂ ਦਿਨ ਇਲਾਕੇ ਵਿੱਚ ਵੱਡੀ ਟਰੈਕਟਰ ਰੈਲੀ ਕੱਢ ਕੇ ਖੇਤੀ ਕਾਨੂੰਨਾਂ ਦਾ ਵਿਰੋਧ ਕੀਤਾ। ਗੁਰਦੁਆਰਾ ਪੁਲ ਪੁਖਤਾ ਸਾਹਿਬ ਤੋਂ ਸ਼ੁਰੂ ਹੋਈ ਟਰੈਕਟਰ ਰੈਲੀ ਵਿੱਚ ਇਲਾਕੇ ਦੇ ਸੈਂਕੜੇ ਕਿਸਾਨ ਆਪਣੇ ਟਰੈਕਟਰ ਲੈ ਕੇ ਸ਼ਾਮਿਲ ਹੋਏ। ਅੱਜ ਦੀ ਟਰੈਕਟਰ ਰੈਲੀ ਬੇਟ ਇਲਾਕੇ ਦੇ ਪਿੰਡਾਂ ਮਿਆਣੀ, ਭੂਲਪੁਰ, ਦਬੁਰਜੀ, ਬੈਂਸ ਅਵਾਣ, ਸਹਬਿਾਜ਼ਪੁਰ ਆਦਿ ਤੋਂ ਹੁੰਦੀ ਹੋਈ ਟਾਂਡਾ ਅਤੇ ਫਿਰ ਚੌਲਾਂਗ ਟੌਲ ਪਲਾਜ਼ਾ ਆ ਕੇ ਸਮਾਪਤ ਹੋਈ।
ਫਗਵਾੜਾ (ਜਸਬੀਰ ਸਿੰਘ ਚਾਨਾ): ਭਾਰਤੀ ਕਿਸਾਨ ਯੂਨੀਅਨ ਦੋਆਬਾ ਵਲੋਂ ਫਗਵਾੜਾ ਤੋਂ ਲੈ ਕੇ ਰਾਮਾ ਮੰਡੀ ਤੱਕ ਇੱਕ ਵਿਸ਼ਾਲ ‘ਟਰੈਕਟਰ ਮਾਰਚ’ ਕੱਢਿਆ ਗਿਆ ਜਿਸ ’ਚ ਵੱਡੀ ਗਿਣਤੀ ’ਚ ਟਰੈਕਟਰ ਸ਼ਾਮਿਲ ਹੋਏ। ਇਹ ਟਰੈਕਟਰ ਮਾਰਚ ਦਾਣਾ ਮੰਡੀ ਤੋਂ ਸ਼ੁਰੂ ਹੋਇਆ ਜਿੱਥੋਂ ਸ਼ੁਰੂ ਹੋ ਕੇ ਹੁਸ਼ਿਆਰਪੁਰ ਰੋਡ, ਬੰਗਾ ਰੋਡ, ਹਰਗੋਬਿੰਦ ਨਗਰ, ਮਾਡਲ ਟਾਊਨ ਚੌਂਕ ਤੋਂ ਹੁੰਦਾ ਹੋਇਆ ਰਾਮਾਮੰਡੀ ਨੂੰ ਰਵਾਨਾ ਹੋਇਆ ਜਿੱਥੋਂ ਵਾਪਸ ਹੋ ਕੇ ਮੁੜ ਫਗਵਾੜਾ ਦਾਣਾ ਮੰਡੀ ਵਿੱਖੇ ਪੁੱਜ ਕੇ ਸਮਾਪਤ ਹੋਇਆ।
