ਅਸਮਾਨੀ ਬਿਜਲੀ ਨਾਲ ਬਿਜਲੀ ਉਪਕਰਨ ਨੁਕਸਾਨੇ;
ਫ਼ਤਹਿਗੜ੍ਹ ਚੂੜੀਆਂ (ਹਰਪਾਲ ਸਿੰਘ ਨਾਗਰਾ): ਇਲਾਕੇ ਵਿੱਚ ਅੱਜ ਜ਼ੋਰਦਾਰ ਮੀਂਹ ਪੈਣ ਨਾਲ ਸ਼ਹਿਰ ਵਿੱਚ ਸਾਰੇ ਪਾਸੇ ਜਲਥਲ ਹੋ ਗਈ। ਬਾਜ਼ਾਰਾਂ, ਸੜਕਾਂ ਅਤੇ ਗਲ਼ੀਆਂ ਵਿੱਚ ਹਰ ਥਾਂ ਮੀਂਹ ਦਾ ਪਾਣੀ ਛੱਪੜ ਦਾ ਰੂਪ ਧਾਰਨ ਕਰ ਗਿਆ। ਬਿਜਲੀ ਬੰਦ ਹੋਣ ਕਰ ਕੇ ਤੇ ਪਾਣੀ ਦੀ ਨਿਕਾਸ ਵਾਲੀ ਮੋਟਰ ਨਾ ਚੱਲਣ ਕਰ ਕੇ ਪਾਣੀ ਕਾਫ਼ੀ ਦੇਰ ਤਕ ਖੜ੍ਹਾ ਰਿਹਾ। ਦੁਕਾਨਾਂ ਅਤੇ ਘਰਾਂ ਵਿੱਚ ਮੀਂਹ ਦਾ ਪਾਣੀ ਦਾਖ਼ਲ ਹੋਣ ਨਾਲ ਲੋਕਾਂ ਨੂੰ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਕਈ ਦੁਕਾਨਦਾਰਾਂ ਅਤੇ ਮਕਾਨ ਮਾਲਕਾਂ ਦਾ ਸਾਮਾਨ ਭਿੱਜਣ ਕਾਰਨ ਖ਼ਰਾਬ ਹੋ ਗਿਆ। ਫ਼ਤਹਿਗੜ੍ਹ ਚੂੜੀਆਂ ਦੇ ਕਈ ਹਿੱਸਿਆਂ ਵਿੱਚ ਅਸਮਾਨੀ ਬਿਜਲੀ ਡਿੱਗਣ ਨਾਲ ਘਰਾਂ ਅਤੇ ਦੁਕਾਨਾਂ ਵਿੱਚ ਲੱਗੇ ਏਸੀ, ਟੀਵੀ, ਪੱਖੇ, ਇਨਵਰਟਰ, ਕੇਬਲ ਅਤੇ ਹੋਰ ਬਿਜਲੀ ਦਾ ਸਾਮਾਨ ਨੁਕਸਾਨਿਆ ਗਿਆ। ਸ਼ਹਿਰ ਵਾਸੀਆਂ ਨੇ ਮੰਗ ਕੀਤੀ ਹੈ ਕਿ ਪਾਣੀ ਦੀ ਨਿਕਾਸੀ ਦਾ ਸਹੀ ਪ੍ਰਬੰਧ ਕੀਤਾ ਜਾਵੇ।
