ਅੰਬਾਲਾ (ਨਿੱਜੀ ਪੱਤਰ ਪ੍ਰੇਰਕ):
ਇੱਥੇ ਅੱਜ ਅੰਮ੍ਰਿਤਸਰ ਤੋਂ ਹਰਿਦੁਆਰ ਲਈ ਰਵਾਨਾ ਹੋਈ ਸ਼ਰਧਾਲੂਆਂ ਨਾਲ ਭਰੀ ਡਬਲ ਡੈਕਰ ਬੱਸ ਸ਼ਾਹਬਾਦ-ਜਗਾਧਰੀ ਰੋਡ ’ਤੇ ਧੁੰਦ ਕਾਰਨ ਬਰਾੜਾ ਲਾਗੇ ਸੀਵਣ ਮਾਜਰਾ ਸਥਿਤ ਚੌਕ ਨਾਲ ਟਕਰਾ ਗਈ। ਕੋਲਕਾਤਾ ਦੇ ਰਹਿਣ ਵਾਲੇ ਬੱਸ ਡਰਾਈਵਰ ਦੇਵਾਸ਼ੀਸ਼ ਸਰਕਾਰ ਨੇ ਦੱਸਿਆ ਕਿ ਉਹ ਬੱਸ ਵਿੱਚ 56 ਯਾਤਰੀਆਂ ਨੂੰ ਲੈ ਕੇ ਹਾਵੜਾ ਤੋਂ ਰਵਾਨਾ ਹੋਇਆ ਸੀ। ਉਹ ਕੱਲ੍ਹ ਅੰਮ੍ਰਿਤਸਰ ਸਾਹਿਬ ਤੋਂ ਹਰਿਦੁਆਰ ਲਈ ਰਵਾਨਾ ਹੋਏ ਸਨ। ਉਹ ਸ਼ਾਹਬਾਦ ਤੋਂ ਜਗਾਧਰੀ ਰੋਡ ’ਤੇ ਤੜਕੇ 3 ਵਜੇ ਦੇ ਕਰੀਬ ਸੀਵਣ ਮਾਜਰਾ ਦੇ ਦਾਨਵੀਰ ਭਾਮਾਸ਼ਾਹ ਚੌਕ ਪਹੁੰਚੇ। ਸੰਘਣੀ ਧੁੰਦ ਕਾਰਨ ਚੌਕ ਨਹੀਂ ਦਿਖਿਆ, ਜਿਸ ਕਾਰਨ ਬੱਸ ਚੌਕ ਨਾਲ ਸਿੱਧੀ ਟਕਰਾ ਗਈ। ਹਾਦਸੇ ਦੌਰਾਨ ਯਾਤਰੀਆਂ ਦਾ ਬਚਾਅ ਹੋ ਗਿਆ ਪਰ ਬੱਸ ਬੁਰੀ ਤਰ੍ਹਾਂ ਨੁਕਸਾਨੀ ਗਈ। ਥਾਣਾ ਬਰਾੜਾ ਦੀ ਪੁਲੀਸ ਮੌਕੇ ’ਤੇ ਪਹੁੰਚ ਕੇ ਜਾਂਚ ਸ਼ੁਰੂ ਕਰ ਦਿੱਤੀ।
