ਗੁਰਦੀਪ ਸਿੰਘ ਭੱਟੀ
ਟੋਹਾਣਾ, 3 ਅਗਸਤ
ਐਤਵਾਰ ਦੇਰ ਰਾਤ ਨੂੰ ਅਗਰੋਹਾ-ਭੂਨਾ ਸੜਕ ’ਤੇ ਤੇਜ਼ ਰਫ਼ਤਾਰ ਕਾਰ ਸੜਕ ਕਿਨਾਰੇ ਦਰੱਖ਼ਤ ’ਚ ਵੱਜ ਕੇ ਦੋ ਟੋਟੇ ਹੋ ਗਈ ਤੇ ਕਾਰ ਚਾਲਕ ਕ੍ਰਿਸ਼ਨ ਕੁਮਾਰ ਦੀ ਮੌਤ ਹੋ ਗਈ। ਦੂਜਾ ਸਵਾਰ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋਣ ’ਤੇ ਹਸਪਤਾਲ ਵਿੱਚ ਭਰਤੀ ਹੈ। ਪੁਲੀਸ ਮੁਤਾਬਕ ਰਾਜਸਥਾਨ ਦੇ ਬਹਿਰੋੜ ਨਿਵਾਸੀ ਕ੍ਰਿਸ਼ਨ ਕੁਮਾਰ (35) ਅਤੇ ਉਨ੍ਹਾਂ ਦਾ ਮਿੱਤਰ ਰਾਕੇਸ਼ ਸ਼ਰਮਾ ਨਾਲ ਕਾਰ (ਆਰ.ਜੇ.02. ਸੀ.ਈ. 0885) ’ਤੇ ਪਿੰਡ ਚੌਬਾਰਾ ਤੋਂ ਭੂਨਾ ਜਾਂਦੇ ਸਮੇਂ ਹਾਦਸੇ ਦਾ ਸ਼ਿਕਾਰ ਹੋ ਗਏ। ਜ਼ਖ਼ਮੀ ਕ੍ਰਿਸਨ ਕੁਮਾਰ ਨੂੰ ਅਗਰੋਹਾ ਭਰਤੀ ਕਰਵਾਇਆ ਤੇ ਹਾਲਤ ਵਿਗੜਨ ’ਤੇ ਉਸਨੂੰ ਹਿਸਾਰ ਦੇ ਨਿੱਜੀ ਹਸਪਤਾਲ ਲਿਜਾਇਆ ਗਿਆ ਜਿੱਥੇ ਉਸਦੀ ਮੌਤ ਹੋ ਗਈ।
ਭੇਤਭਰੀ ਹਾਲਤ ’ਚ ਔਰਤ ਦੀ ਮੌਤ
ਪਿੰਡ ਕੰਨੜੀ ਦੀ 45 ਸਾਲਾ ਔਰਤ ਕਮਲੇਸ਼ ਦੀ ਭੇਤ-ਭਰੀ ਹਾਲਤ ’ਚ ਮੌਤ ਹੋ ਗਈ। ਪੋਸਟ-ਮਾਰਟਮ ਦੀ ਰਿਪੋਰਟ ਮੌਤ ਦਾ ਕਾਰਨ ਕੋਈ ਜ਼ਹਿਰੀਲੀ ਚੀਜ਼ ਖਾਣਾ ਦੱਸਿਆ ਗਿਆ ਹੈ। ਪਰਿਵਾਰ ਨੇ ਦੱਸਿਆ ਕਿ ਬਿਮਾਰ ਔਰਤ ਨੇ ਗਲਤੀ ਨਾਲ ਕੋਈ ਜ਼ਹਿਰੀਲੀ ਚੀਜ਼ ਖਾ ਲਈ ਸੀ।
ਕਰੰਟ ਲੱਗਣ ਕਾਰਨ ਕਿਸਾਨ ਦੀ ਮੌਤ
ਪਿੰਡ ਢਾਣੀ ਚਾਲਣ ਦੇ ਕਿਸਾਨ ਰਾਮਕੁਮਾਰ (40) ਦੀ ਐਤਵਾਰ ਰਾਤ ਟਿਊਬਵੈੱਲ ਚਲਾਉਂਦੇ ਸਮੇਂ ਕਰੰਟ ਲੱਗਣ ਕਾਰਨ ਮੌਤ ਹੋ ਗਈ। ਪਰਿਵਾਰ ਮੁਤਾਬਕ ਮੋਟਰ ਚਲਾਉਂਦੇ ਸਮੇਂ ਨੰਗੀ ਤਾਰ ਨੂੰ ਹੱਥ ਲੱਗਣ ਕਾਰਨ ਹਾਦਸਾ ਵਾਪਰਿਆ ਹੈ।
