ਪੱਤਰ ਪ੍ਰੇਰਕ
ਟੋਹਾਣਾ, 13 ਨਵੰਬਰ
ਪੁਲੀਸ ਨੇ ਅੱਜ ਪਿੰਡ ਬਿਰਹੀਵਾਲ, ਥਾਣਾ ਕਲਾਨੌਰ ਤੋਂ ਅਨੰਦ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਉਹ ਅਨਾਜ ਮੰਡੀ ਟੋਹਾਣਾ ਦੇ ਚੌਲ ਵਪਾਰੀ ਪ੍ਰਸ਼ੋਤਮ ਜਿੰਦਲ ਦਾ ਡਰਾਈਵਰ ਸੀ। ਉਸ ’ਤੇ ਚੌਲ ਵਪਾਰੀ ਪ੍ਰਸ਼ੋਤਮ ਦੇ ਦਫ਼ਤਰ ਵਿੱਚੋਂ ਦੋ ਵਪਾਰੀਆਂ ਦੀ ਆਈ ਰਾਸ਼ੀ ਚੋਰੀ ਕਰਨ ਦਾ ਦੋਸ਼ ਹੈ। ਵਪਾਰੀ ਮੁਤਾਬਿਕ ਹਫ਼ਤਾ ਪਹਿਲਾਂ ਦੋ ਚੌਲ ਵਪਾਰੀ ਪੈਸੇ ਜਮ੍ਹਾਂ ਕਰਵਾ ਕੇ ਗਏ ਸਨ। ਉਸ ਸਮੇਂ ਅਨੰਦ ਮੌਜੂਦ ਸੀ। ਇਕ ਵਪਾਰੀ ਦੇ 9,46,500 ਰੁਪਏ ਗਿਣ ਕੇ ਅਲਮਾਰੀ ਵਿੱਚ ਰਖੇ ਸਨ ਜਦੋਂਕਿ ਦੂਜੇ ਵਪਾਰੀ ਦੇ ਪੈਸਿਆਂ ਦਾ ਬੰਡਲ ਅਲਮਾਰੀ ਵਿੱਚ ਅਣਗਿਣਿਆ ਹੀ ਰੱਖ ਕੇ ਉਹ ਢਾਬੇ ਤੋਂ ਚਾਹ ਪੀਣ ਗਿਆ ਸੀ। ਮਗਰੋਂ ਅਨੰਦ ਅਲਮਾਰੀ ਵਿੱਚੋਂ ਦੋਵੇਂ ਬੰਡਲ ਚੋਰੀ ਕਰਕੇ ਫ਼ਰਾਰ ਹੋ ਗਿਆ। ਮੰਡੀ ਦੀ ਪੰਚਾਇਤ ਉਸ ਦੇ ਘਰ ਗਈ ਤਾਂ ਉਹ ਗਾਇਬ ਸੀ। ਥਾਣੇ ਸ਼ਿਕਾਇਤ ਦਰਜ ਕਰਨ ’ਤੇ ਪੁਲੀਸ ਉਸ ਦੀ ਭਾਲ ਕਰ ਰਹੀ ਸੀ। ਅੱਜ ਪਿੰਡ ਪੁੱਜਣ ’ਤੇ ਪੁਲੀਸ ਨੇ ਛਾਪਾ ਮਾਰ ਕੇ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰ ਲਿਆ।
