ਨਿੱਜੀ ਪੱਤਰ ਪ੍ਰੇਰਕ
ਖੰਨਾ, 30 ਅਪਰੈਲ
ਇਥੋਂ ਦੇ ਨੇੜਲੇ ਪਿੰਡ ਲਬਿੜਾ ਵਿੱਚ ਵਾਪਰੇ ਦਰਦਨਾਕ ਸੜਕ ਹਾਦਸੇ ਦੌਰਾਨ 2 ਟਰੱਕਾਂ ਦੀ ਹੋਈ ਆਪਸੀ ਟੱਕਰ ਵਿੱਚ ਇਕ ਟਰੱਕ ਚਾਲਕ ਦੀ ਮੌਤ ਹੋ ਗਈ। ਜਾਣਕਾਰੀ ਦਿੰਦਿਆਂ ਏਐੱਸਆਈ ਹਰਜਿੰਦਰ ਸਿੰਘ ਭੈਣੀ ਨੇ ਦੱਸਿਆ ਕਿ ਖੰਨਾ ਵੱਲੋਂ ਆ ਰਹੇ ਇਕ ਕੈਂਟਰ ਨੰਬਰ-ਪੀਬੀ65ਪੀ8487 ਦਾ ਡਰਾਈਵਰ ਬਲਵੀਰ ਸਿੰਘ ਵਾਸੀ ਡੇਰਾ ਬੱਸੀ ਜੋ ਸਾਮਾਨ ਲੈ ਕੇ ਲੁਧਿਆਣਾ ਜਾ ਰਿਹਾ ਸੀ, ਜਦੋਂ ਪਿੰਡ ਲਬਿੜਾ ਪੁੱਜਿਆ ਤਾਂ ਅੱਗੇ ਜਾ ਰਿਹਾ ਘੋੜਾ ਟਰਾਲਾ ਨੰਬਰ-ਪੀਬੀ13ਬੀਬੀ5556 ਦੇ ਚਾਲਕ ਨੇ ਟਰੱਕ ਦੀਆਂ ਬਰੇਕਾਂ ਲਗਾ ਦਿੱਤੀਆਂ ਤੇ ਪਿਛੋਂ ਆ ਰਿਹਾ ਬਲਵੀਰ ਸਿੰਘ ਦਾ ਟਰੱਕ ਉਸ ਵਿੱਚ ਜਾ ਵੱਜਿਆ। ਬਲਵੀਰ ਸਿੰਘ ਦੀ ਮੌਕੇ ’ਤੇ ਮੌਤ ਹੋ ਗਈ। ਹਰਜਿੰਦਰ ਸਿੰਘ ਨੇ ਕਿਹਾ ਕਿ ਟਰੱਕ ਚਾਲਕ ਫਰਾਰ ਹੋ ਗਿਆ, ਜਿਸ ਖਿਲਾਫ ਕੇਸ ਦਰਜ ਕਰਕੇ ਕਾਰਵਾਈ ਅਰੰਭ ਦਿੱਤੀ ਹੈ।
