ਗਗਨਦੀਪ ਅਰੋੜਾ
ਲੁਧਿਆਣਾ, 2 ਜੂਨ
ਸਨਅਤੀ ਸ਼ਹਿਰ ਦੇ ਰਘੁਬੀਰ ਪਾਰਕ ਇਲਾਕੇ ਵਿਚ ਬਜ਼ੁਰਗ ਜੋੜੇ ਨੇ ਤੇਲ ਪਾ ਕੇ ਸ਼ੱਕੀ ਹਲਾਤਾਂ ਵਿਚ ਅੱਗ ਲਗਾ ਲਈ। ਜ਼ਖਮੀਆਂ ਨੂੰ ਗੁਆਂਢੀਆਂ ਨੇ ਸੀਐੱਮਸੀ ਹਸਪਤਾਲ ਵਿਚ ਦਾਖਲ ਕਰਵਾਇਆ ਗਿਆ ਹੈ। ਬਜ਼ੁਰਗ ਜੋੜੇ ਦੀ ਪਛਾਣ ਸੁਨੀਲ ਜੈਨ (65) ਤੇ ਚੰਚਲ ਜੈਨ (60) ਵਜੋਂ ਹੋਈ ਹੈ। ਗੁਆਂਢੀਆਂ ਨੇ ਕਮਰੇ ਵਿਚ ਅੱਗ ਲੱਗੀ ਤਾਂ ਉਨ੍ਹਾਂ ਕਿਸੇ ਤਰ੍ਹਾਂ ਪਹਿਲਾਂ ਅੱਗ ਬੁਝਾਈ ਤੇ ਦੋਵਾਂ ਨੂੰ ਇਲਾਜ ਲਈ ਹਸਪਤਾਲ ਪਹੁੰਚਾਇਆ। ਥਾਣਾ ਜਗਤਪੁਰੀ ਦੇ ਇੰਚਾਰਜ ਏਐੱਸਆਈ ਮਲਕੀਤ ਸਿੰਘ ਨੇ ਦੱਸਿਆ ਕਿ ਅੱਜ ਸਵੇਰੇ ਹੀ ਬਜ਼ੁਰਗ ਜੋੜੇ ਦੀ ਆਪਣੀ ਵੱਡੀ ਨੂੰਹ ਨਾਲ ਤਕਰਾਰ ਹੋਈ ਸੀ,ਜਿਸ ਦੀ ਸੂਚਨਾ ਪੁਲੀਸ ਕੰਟਰੋਲ ਰੂਮ ’ਤੇ ਜਾਣ ਤੋਂ ਬਾਅਦ ਉਹ ਮੌਕੇ ’ਤੇ ਪੁੱਜੇ ਵੀ ਸਨ, ਪਰ ਮਾਮਲਾ ਘਰੇਲੂ ਹੋਣ ਕਾਰਨ ਦੋਵਾਂ ਧਿਰਾਂ ਨੂੰ ਸਮਝਾ ਕੇ ਉਹ ਵਾਪਸ ਪਰਤ ਗਏ ਸਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਫਿਲਹਾਲ ਪੁਲੀਸ ਮਾਮਲੇ ਤਫ਼ਤੀਸ਼ ਕਰ ਰਹੀ ਹੈ। ਉਨ੍ਹਾਂ ਦੱਸਿਆ ਕਿ ਸੁਨੀਲ ਜੈਨ ਰੇਲਵੇ ਤੋਂ ਸੇਵਾਮੁਕਤ ਹਨ ਤੇ ਉਸ ਦਾ ਇੱਕ ਪੁੱਤ ਰੇਲਵੇ ਵਿਚ ਤੇ ਦੂਜਾ ਪ੍ਰਾਈਵੇਟ ਕੰਪਨੀ ਵਿਚ ਕੰਮ ਕਰਦਾ ਹੈ।
