ਟ੍ਰਿਬਿਊਨ ਨਿਊਜ਼ ਸਰਵਿਸ
ਲੁਧਿਆਣਾ, 19 ਅਪਰੈਲ
ਸਲੇਮ ਟਾਬਰੀ ਚਾਂਦ ਸਿਨੇਮਾ ਨੇੜੇ ਅੱਜ ਸਵੇਰੇ ਪਟਾਕਿਆਂ ਨਾਲ ਭਰੇ ਟਰੱਕ ਵਿੱਚੋਂ ਕੁਝ ਪੇਟੀਆਂ ਹੇਠਾਂ ਡਿੱਗਣ ਕਾਰਨ ਧਮਾਕਾ ਹੋ ਗਿਆ, ਜਿਸ ਨਾਲ ਇਲਾਕੇ ਦੇ ਲੋਕ ਸਹਿਮ ਗਏ। ਲੋਕਾਂ ਵੱਲੋਂ ਦਿੱਤੀ ਸੂਚਨਾ ’ਤੇ ਘਟਨਾ ਵਾਲੀ ਥਾਂ ਉਪਰ ਪੁੱਜੀ ਪੁਲੀਸ ਨੇ ਮੌਕੇ ਤੋਂ ਪੇਟੀਆਂ ਨੂੰ ਹਟਵਾਇਆ ਤੇ ਟਰੱਕ ਨੂੰ ਥਾਣੇ ਲਿਜਾਇਆ ਗਿਆ। ਇਸ ਸਬੰਧੀ ਥਾਣਾ ਸਲੇਮ ਟਾਬਰੀ ਦੇ ਐੱਸਐੱਚਓ ਇੰਸਪੈਕਟਰ ਕੁਲਵੰਤ ਸਿੰਘ ਨੇ ਦੱਸਿਆ ਕਿ ਟਰੱਕ ਵਿੱਚ ਹੱਥ ਨਾਲ ਚਲਾਉਣ ਵਾਲੇ ਬੱਚਿਆਂ ਦੇ ਪਟਾਕੇ ਸਨ, ਜਿਨ੍ਹਾਂ ਨੂੰ ਟਰੱਕ ਚਾਲਕ ਸੰਗਰੂਰ ਤੋਂ ਸਾਹਨੇਵਾਲ ਲਿਜਾ ਰਿਹਾ ਸੀ। ਇਸ ਦੌਰਾਨ ਉਹ ਸਲੇਮ ਟਾਬਰੀ ਨੇੜੇ ਰਸਤਾ ਭੁੱਲ ਗਿਆ ਤੇ ਰਿਹਾਇਸ਼ੀ ਇਲਾਕੇ ਵਿੱਚ ਵੜ ਗਿਆ। ਜਦੋਂ ਟੁੱਟੀ ਹੋਈ ਸੜਕ ਤੋਂ ਟਰੱਕ ਗੁਜ਼ਰਿਆ ਤਾਂ ਕੁਝ ਪੇਟੀਆਂ ਥੱਲੇ ਡਿੱਗ ਗਈਆਂ ਅਤੇ ਮੌਕੇ ’ਤੇ ਵੱਡਾ ਧਮਾਕਾ ਹੋ ਗਿਆ।
