ਜਗਰਾਉਂ (ਪੱਤਰ ਪ੍ਰੇਰਕ): ਪੁਲੀਸ ਨੇ ਝੂਠੀ ਨਿਸ਼ਾਨਦੇਹੀ ਦੇ ਆਧਾਰ ’ਤੇ ਜ਼ਮੀਨ ਉੱਤੇ ਕਥਿਤ ਕਬਜ਼ਾ ਕਰਨ ਦੀ ਕੋਸ਼ਿਸ਼ ਦੇ ਦੋਸ਼ ਹੇਠ ਜਗਰਾਓਂ ਦੇ ਫਾਇਨਾਂਸਰ, ਸਾਬਕਾ ਕਾਨੂੰਨਗੋ ਤੇ ਕੁੱਝ ਹੋਰ ਅਣਪਛਾਤੇ ਵਿਅਕਤੀਆਂ ਖ਼ਿਲਾਫ਼ ਕੇਸ ਦਰਜ ਕੀਤਾ ਹੈ। ਮੁਲਜ਼ਮ ਦੀ ਪਛਾਣ ਮਨਮੋਹਨ ਕਤਿਆਲ ਤੇ ਸੇਵਾਮੁਕਤ ਕਾਨੂੰਨਗੋ ਮੋਹਣ ਸਿੰਘ ਵਜੋਂ ਹੋਈ ਹੈ। ਸਿਮਰਨਜੀਤ ਸਿੰਘ ਤੂਰ ਵਾਸੀ ਹੀਰਾ ਬਾਗ਼ ਨੇ ਐੱਸਐੱਸਪੀ ਨਵਨੀਤ ਸਿੰਘ ਬੈਂਸ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਦੋਸ਼ ਲਾਇਆ ਉਨ੍ਹਾਂ ਦੀ ਜ਼ਮੀਨ ਮਨਮੋਹਨ ਕਤਿਆਲ ਦੀ ਜ਼ਮੀਨ ਦੇ ਨਾਲ ਲੱਗਦੀ ਹੈ ਜਿਸ ਸਬੰਧੀ ਦੋਹਾਂ ਧਿਰਾਂ ਦਾ ਵਿਵਾਦ ਚੱਲ ਰਿਹਾ ਹੈ। ਆਪਣਾ ਪੱਖ ਮਜ਼ਬੂਤ ਕਰਨ ਤੇ ਹੱਕ ਜਤਾਉਣ ਲਈ ਮਨਮੋਹਨ ਨੇ ਉਕਤ ਜ਼ਮੀਨ ਦੀ ਨਿਸ਼ਾਨਦੇਹੀ ਕਰਵਾਉਣ ਲਈ ਲੋਕਲ ਕਮਿਸ਼ਨਰ ਵਜੋਂ ਆਪਣੇ ਸਾਥੀ ਸਾਬਕਾ ਕਾਨੂੰਨਗੋ ਮੋਹਣ ਸਿੰਘ ਬਾੜੇਵਾਲ ਨੂੰ ਨਿਯੁਕਤ ਕਰਵਾ ਕੇ ਕਥਿਤ ਫਰਜ਼ੀ ਰਿਪੋਰਟ ਤਿਆਰ ਕਰਵਾਈ ਗਈ।