ਪੱਤਰ ਪ੍ਰੇਰਕ
ਮਾਛੀਵਾੜਾ, 4 ਸਤੰਬਰ
ਇਥੇ ਰਤੀਪੁਰ ਰੋਡ ’ਤੇ ਸਥਿਤ ਗੁੱਗਾ ਜਾਹਰ ਵੀਰ ਦੀ ਮੈੜੀ ’ਤੇ ਪ੍ਰਬੰਧਕ ਕਮੇਟੀ ਵਲੋਂ ਦੁਸਹਰਾ ਮੈਦਾਨ ਵਿਚ ਸਾਲਾਨਾ ਦੰਗਲ ਕਰਵਾਇਆ ਗਿਆ, ਜਿਸ ਵਿਚ 3 ਦਰਜਨ ਭਲਵਾਨਾਂ ਨੇ ਭਾਗ ਲੈ ਕੇ ਦਰਸ਼ਕਾਂ ਤੋਂ ਵਾਹ-ਵਾਹ ਖੱਟੀ। ਦੰਗਲ ਮੇਲੇ ’ਚ ਜਿੱਥੇ ਵਿਨੈ ਮਾਛੀਵਾੜਾ ਨੇ ਸਾਫ਼-ਸੁਥਰੀ ਕੁਸ਼ਤੀ ਲੜਦਿਆਂ ਜੌਨੀ ਦੋਰਾਹਾ ਨੂੰ ਹਰਾ ਕੇ ਝੰਡੀ ਦੀ ਕੁਸ਼ਤੀ ਜਿੱਤੀ ਉੱਥੇ ਮੇਲੇ ਵਿਚ ਬਾਬਾ ਭਗਤੀਨਾਥ ਅਖਾੜਾ, ਬਾਬਾ ਫਲਾਹੀ ਅਖਾੜਾ, ਮਲੇਰਕੋਟਲਾ, ਅਟਾਰੀ ਤੇ ਦੋਰਾਹਾ ਆਦਿ ਅਖਾੜਿਆਂ ’ਚੋਂ ਜਗਜੀਤ ਖਮਾਣੋ ਤੇ ਗੈਰੀ ਪਹਿਲਵਾਨ, ਜਸ਼ਨ ਮਾਛੀਵਾੜਾ ਤੇ ਅਲੀ ਫਲਾਹੀ ਅਤੇ ਅਮਨ ਦੋਰਾਹਾ ਤੇ ਰੁਸਤਮ ਮਾਛੀਵਾੜਾ ਦੀਆਂ ਕੁਸ਼ਤੀਆਂ ਨੂੰ ਦਰਸ਼ਕਾਂ ਵਲੋਂ ਵੱਧ ਦਿਲਚਸਪੀ ਨਾਲ ਦੇਖਦਿਆਂ ਗੱਭਰੂਆਂ ਦਾ ਰੁਪਏ ਨਾਲ ਮਾਣ ਕੀਤਾ। ਇਸ ਮੌਕੇ ਵਿਧਾਇਕ ਅਮਰੀਕ ਸਿੰਘ ਢਿੱਲੋਂ, ਅਕਾਲੀ ਉਮੀਦਵਾਰ ਪਰਮਜੀਤ ਸਿੰਘ ਢਿੱਲੋਂ, ਚੇਅਰਮੈਨ ਸ਼ਕਤੀ ਆਨੰਦ, ਨਗਰ ਕੌਂਸਲ ਸਮਰਾਲਾ ਪ੍ਰਧਾਨ ਕਰਨਵੀਰ ਸਿੰਘ ਢਿੱਲੋਂ ਤੇ ਨਗਰ ਕੌਂਸਲ ਪ੍ਰਧਾਨ ਸੁਰਿੰਦਰ ਕੁੰਦਰਾ ਸਣੇ ਹੋਰ ਆਗੂ ਵੀ ਮੌਜੂਦ ਸਨ। ਜੇਤੂ ਪਹਿਲਵਾਨਾਂ ਨੂੰ ਮੁੱਖ ਮਹਿਮਾਨਾਂ ਤੇ ਪ੍ਰਬੰਧਕ ਕਮੇਟੀ ਵਲੋਂ ਸਨਮਾਨਿਤ ਕੀਤਾ ਗਿਆ।
