ਦੇਵਿੰਦਰ ਸਿੰਘ ਜੱਗੀ
ਪਾਇਲ, 20 ਮਾਰਚ
ਏਸ਼ੀਅਨ ਬਾਕਸਿੰਗ ਚੈਂਪੀਅਨਸ਼ਿਪ ਵਿੱਚੋਂ ਸੋਨੇ ਦਾ ਤਮਗਾ ਜਿੱਤ ਕੇ ਆਈ ਖੰਨਾ ਸ਼ਹਿਰ ਦੀ ਧੀ ਸ਼ਾਹੀਨ ਗਿੱਲ ਦਾ ਸਿਟੀ ਪ੍ਰੈੱਸ ਵੱਲੋਂ ਈਸੜੂ ਵਿੱਚ ਵਿਸ਼ੇਸ਼ ਸਨਮਾਨ ਕੀਤਾ ਗਿਆ। ਇਸ ਤੋਂ ਪਹਿਲਾਂ ਇਸ ਹੋਣਹਾਰ ਧੀ ਦਾ ਰਸੂਲੜਾ, ਮਾਜਰੀ, ਇਕੋਲਾਹਾ, ਕੋਟਲਾ ਢੱਕ, ਈਸੜੂ ਖੁਰਦ ਅਤੇ ਈਸੜੂ ਆਦਿ ਪਿੰਡਾਂ ਵਿੱਚ ਇਕ ਰੋਡ ਸ਼ੋਅ ਦੌਰਾਨ ਨਿੱਘਾ ਸਵਾਗਤ ਕੀਤਾ ਗਿਆ। ਈਸੜੂ ਪੁੱਜਣ ’ਤੇ ਸ਼ਾਹੀਨ ਗਿੱਲ ਦਾ ਸਿਟੀ ਪ੍ਰੈਸ ਕਲੱਬ ਦੇ ਮੈਂਬਰਾਂ ਵੱਲੋਂ ਸਿਰੋਪਾਓ ਅਤੇ ਸਨਮਾਨ ਚਿੰਨ੍ਹ ਨਾਲ ਸਨਮਾਨ ਕੀਤਾ ਗਿਆ। ਇਸ ਮੌਕੇ ਇਸ ਹੋਣਹਾਰ ਧੀ ਨੇ ਪੱਤਰਕਾਰਾਂ ਨਾਲ ਗੱਲ ਕਰਦਿਆਂ ਕਿਹਾ ,‘‘ਮੈਨੂੰ ਮਾਣ ਹੈ ਕਿ ਮੈਂ ਆਪਣੇ ਸ਼ਹਿਰ, ਪੰਜਾਬ ਤੇ ਦੇਸ਼ ਦਾ ਨਾਂ ਰੌਸ਼ਨ ਕੀਤਾ ਹੈ ਤੇ ਹੁਣ ਮੇਰਾ ਅਗਲਾ ਨਿਸ਼ਾਨਾ ਕਾਮਨ ਵੈਲਥ ਖੇਡਾਂ ਤੇ ਉਲੰਪਿਕ ’ਚੋਂ ਸੋਨੇ ਦਾ ਤਮਗਾ ਹਾਸਲ ਕਰਨਾ ਹੈ, ਜਿਸ ਲਈ ਮੈਨੂੰ ਸਖ਼ਤ ਮਿਹਨਤ ਕਰਨੀ ਪਏਗੀ।’’ ਇਸ ਮੌਕੇ ਪ੍ਰਧਾਨ ਦੇਵਿੰਦਰ ਸਿੰਘ ਜੱਗੀ, ਸਾਬਕਾ ਜ਼ਿਲ੍ਹਾ ਪਰਿਸ਼ਦ ਮੈਂਬਰ ਗੁਰਦੀਪ ਸਿੰਘ ਨੀਟੂ ਲਬਿੜਾ, ਬੀਬੀ ਫਾਤਿਮਾ, ਬਲਵਿੰਦਰ ਸਿੰਘ, ਨਰਿੰਦਰ ਸਿੰਘ ਸ਼ਾਹਪੁਰ, ਅਜਮੇਰ ਸਿੰਘ ਦੀਵਾ ਆਦਿ ਹਾਜ਼ਰ ਸਨ।
