ਖੇਤਰੀ ਪ੍ਰਤੀਨਿਧ
ਲੁਧਿਆਣਾ, 18 ਸਤੰਬਰ
ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਵੱਲੋਂ ਪੀਏਯੂ ਕੈਂਪਸ ਵਿੱਚ ਬੀਤੇ ਦਿਨੀਂ ਲਾਏ ਕਿਸਾਨ ਮੇਲੇ ਨੂੰ ਸੋਸ਼ਲ ਮੀਡੀਆ ਰਾਹੀਂ ਲੋਕਾਂ ਤੱਕ ਲਾਈਵ ਪਹੁੰਚਾਉਣ ਵਾਲੀ ਟੀਮ ਦਾ ਅੱਜ ਸਨਮਾਨ ਕੀਤਾ ਗਿਆ। ਸੋਸ਼ਲ ਮੀਡੀਆ ਰਾਹੀਂ ਇਸ ਮੇਲੇ ਨੂੰ ਨਾ ਸਿਰਫ ਪੰਜਾਬ, ਭਾਰਤ ਸਗੋਂ ਹੋਰਨਾਂ ਮੁਲਕਾਂ ਤੋਂ ਵੀ ਵੱਡੀ ਕਿਸਾਨਾਂ ਨੇ ਵੇਖਿਆ।
ਇਸ ਵਾਰ ਕਿਸਾਨ ਮੇਲਾ 13 ਤੇ 14 ਸਤੰਬਰ ਨੂੰ ਲਾਇਆ ਗਿਆ ਸੀ। ਇਸ ਮੇਲੇ ਨੂੰ ਹੋਰਨਾਂ ਥਾਵਾਂ ’ਤੇ ਰਹਿੰਦੇ ਕਿਸਾਨਾਂ ਦੀ ਸਹੂਲਤ ਲਈ ਯੂਨੀਵਰਸਿਟੀ ਦੇ ਫੇਸਬੁੱਕ ਪੇਜ ਅਤੇ ਯੂਟਿਊਬ ਚੈਨਲ ਤੋਂ ਲਾਈਵ ਦਿਖਾਇਆ ਗਿਆ। ਯੂਨੀਵਰਸਿਟੀ ਦੇ ਨਿਰਦੇਸ਼ਕ ਪਸਾਰ ਸਿੱਖਿਆ ਡਾ. ਮੱਖਣ ਸਿੰਘ ਭੁੱਲਰ ਨੇ ਦੱਸਿਆ ਕਿ ਇਨ੍ਹਾਂ ਦੋਹਾਂ ਮਾਧਿਅਮਾਂ ਰਾਹੀਂ ਲੱਖਾਂ ਦੀ ਗਿਣਤੀ ਵਿੱਚ ਲੋਕ ਕਿਸਾਨ ਮੇਲੇ ਦੇ ਨਾਲ ਜੁੜੇ। ਯੂਨੀਵਰਸਿਟੀ ਦੇ ਉੱਚ ਨਿਰਦੇਸ਼ਕ ਸੰਚਾਰ ਡਾ. ਤੇਜਿੰਦਰ ਸਿੰਘ ਰਿਆੜ ਨੇ ਦੱਸਿਆ ਕਿ ਇਸ ਲਾਈਵ ਮੇਲੇ ਦੀ ਖਾਸਿਅਤ ਇਹ ਰਹੀ ਕਿ ਇੱਕੋ ਸਮੇਂ ਮੁੱਖ ਪੰਡਾਲ, ਬੀਜ ਵਿਕਰੀ ਕੇਂਦਰ, ਪ੍ਰਦਰਸ਼ਨੀ ਪਲਾਟ, ਵਿਭਾਗਾਂ ਦੇ ਸਟਾਲਾਂ, ਵਿਗਿਆਨੀਆਂ ਦੇ ਨਾਲ ਵਾਰਤਾਲਾਪਾਂ ਆਦਿ ਨਾਲ-ਨਾਲ ਦਿਖਾਈਆਂ ਗਈਆਂ।