ਨਿੱਜੀ ਪੱਤਰ ਪ੍ਰੇਰਕ
ਲੁਧਿਆਣਾ, 10 ਨਵੰਬਰ
ਥਾਣਾ ਲਾਡੋਵਾਲ ਦੀ ਪੁਲੀਸ ਨੇ ਸਤਲੁਜ ਦਰਿਆ ਬੰਨ੍ਹ ਤੋਂ ਤਲਵੰਡੀ ਕਲਾਂ ਨੂੰ ਆਉਂਦੀ ਸੜਕ ’ਤੇ ਗੈਰ ਕਾਨੂੰਨੀ ਖਣਨ ਕਰਨ ਦੇ ਦੋਸ਼ ਹੇਠ ਇੱਕ ਵਿਅਕਤੀ ਨੂੰ ਕਾਬੂ ਕੀਤਾ ਹੈ। ਇਸ ਸਬੰਧੀ ਥਾਣੇਦਾਰ ਕੇਵਲ ਕ੍ਰਿਸ਼ਨ ਨੇ ਦੱਸਿਆ ਕਿ ਪੁਲੀਸ ਪਾਰਟੀ ਲਾਡੋਵਾਲ ਚੌਕ ਮੌਜੂਦ ਸੀ ਤਾਂ ਮੁਖਬਰ ਨੇ ਇਤਲਾਹ ਦਿੱਤੀ ਕਿ ਕੁੱਝ ਲੋਕ ਸਤਲੁਜ ਦਰਿਆ ਅੰਦਰ ਪੈਂਦੀਆਂ ਜ਼ਮੀਨਾਂ ’ਚੋਂ ਜੇਸੀਬੀ ਮਸ਼ੀਨਾਂ ਰਾਹੀਂ ਰੇਤ ਚੋਰੀ ਕਰਕੇ ਸਤਲੁਜ ਦਰਿਆ ਬੰਨ੍ਹ ਤੋ ਤਲਵੰਡੀ ਕਲਾਂ ਨੂੰ ਆਉਂਦੀ ਸੜਕ ਵੱਲ ਆ ਰਹੇ ਹਨ। ਪੁਲੀਸ ਰਾਹੁਲ ਨੂੰ ਗ੍ਰਿਫ਼ਤਾਰ ਕਰਕੇ ਇੱਕ ਟਰੈਕਟਰ ਟਰਾਲੀ ਤੇ ਦੋ ਟਿੱਪਰ ਬਰਾਮਦ ਕੀਤੇ ਹਨ। ਸਿਮਰਨਜੀਤ ਸਿੰਘ, ਹੁਸਨ ਲਾਲ, ਨਿੰਦੀ ਵਾਸੀ ਕੁਤਬੇਵਾਲ ਅਰਾਈਆਂ, ਪ੍ਰਭਦਿਆਲ, ਚਮਨ ਲਾਲ ਤੇ ਰਾਹੁਲ ਵਾਸੀਆਨ ਪਿੰਡ ਤਲਵੰਡੀ ਕਲਾਂ ਦੀ ਭਾਲ ਕੀਤੀ ਜਾ ਰਹੀ ਹੈ।
