ਪੱਤਰ ਪ੍ਰੇਰਕ
ਜਗਰਾਉਂ,10 ਅਕਤੂਬਰ
ਥਾਣਾ ਜਗਰਾਉਂ ਦੀ ਪੁਲੀਸ ਨੇ ਬੀਤੇ ਕੱਲ੍ਹ ਅੱਠ ਸਾਲਾ ਬੱਚੇ ਨਾਲ ਪਿਛਲੇ ਤਿੰਨ ਸਾਲ ਤੋਂ ਬਦਫੈਲੀ ਕਰਨ ਵਾਲੇ ਜੱਸੀ ਬਾਬੇ ਨੂੰ ਅਦਾਲਤ ’ਚ ਪੇਸ਼ ਕਰਕੇ ਇੱਕ ਦਿਨ ਦਾ ਰਿਮਾਂਡ ਹਾਸਲ ਕੀਤਾ। ਥਾਣਾ ਸ਼ਹਿਰੀ ਦੇ ਇੰਚਾਰਜ ਨੇ ਦੱਸਿਆ ਕਿ ਮੁਲਜ਼ਮ ਵੱਲੋਂ ਬੱਚੇ ਦੀ ਵੀਡੀਓ ਬਣਾਉਣ ਲਈ ਜੋ ਮੋਬਾਈਲ ਫੋਨ ਵਰਤਿਆ ਗਿਆ ਸੀ, ਉਹ ਵੀ ਜ਼ਬਤ ਕਰ ਲਿਆ ਗਿਆ ਹੈ। ਪੁਲੀਸ ਰਿਮਾਂਡ ਹੋਰ ਵਧਾਉਣ ਦਾ ਯਤਨ ਕਰ ਰਹੀ ਹੈ। ਦੂਜੇ ਪਾਸੇ ਪੰਜਾਬ ਰਾਜ ਬਾਲ ਅਧਿਕਾਰ ਰੱਖਿਆ ਕਮਿਸ਼ਨ ਦੇ ਚੈਅਰਮੈਨ ਕੰਵਰਪਾਲ ਸਿੰਘ ਨੇ ਉਕਤ ਮਾਮਲੇ ਦਾ ਸਖ਼ਤ ਨੋਟਿਸ ਲੈਂਦਿਆਂ ਸੀਨੀਅਰ ਪੁਲੀਸ ਕਪਤਾਨ ਨਵਨੀਤ ਸਿੰਘ ਬੈਂਸ ਨੂੰ ਪੱਤਰ ਲਿਖ ਕੇ ਆਖਿਆ ਕਿ ਇਸ ਮਾਮਲੇ ਦੀ ਗੰਭੀਰਤਾ ਨੂੰ ਸਮਝਦੇ ਹੋਏ ਡੂੰਘਾਈ ਨਾਲ ਜਾਂਚ ਕੀਤੀ ਜਾਵੇ। ਕਮਿਸ਼ਨ ਨੇ ਸਮੁੱਚੀ ਜਾਣਕਾਰੀ ਤਿੰਨ ਦਿਨਾਂ ਅੰਦਰ ਭੇਜਣ ਲਈ ਕਿਹਾ ਹੈ।