ਚਰਨਜੀਤ ਸਿੰਘ ਢਿੱਲੋਂ
ਜਗਰਾਉਂ, 14 ਅਗਸਤ
ਕਰੋਨਾ ਮਰੀਜ਼ਾਂ ਲਈ ਵਿਭਾਗ ਕੋਲ ਖਾਣਾ ਦੇਣ ਲਈ ਕੋਈ ਫੰਡ ਨਹੀਂ ਹੈ। ਕੰਟੀਨ ਵਾਲੇ ਦਾ ਲੱਖ ਤੋਂ ਉਪਰ ਬਣਿਆ ਬਿੱਲ ਰੌਲਾ ਪੈਣ ’ਤੇ 66 ਹਜ਼ਾਰ ਦੇ ਕਰੀਬ ਦੇ ਕੇ ਬੁੱਤਾ ਸਾਰਿਆ ਗਿਆ। ਉਹ ਕਰੋਨਾ ਦੇ ਸ਼ੁਰੂਆਤੀ ਦਿਨਾਂ ਤੋਂ ਲੈ ਕੇ ਲੌਕਡਾਊਨ ਖਤਮ ਹੋਣ ਤੱਕ ਆਈਸੋਲੇਸ਼ਨ ਵਾਰਡਾਂ ਵਿੱਚ ਦਾਖ਼ਲ ਕਰੋਨਾ ਪੀੜਤ ਮਰੀਜ਼ਾਂ ਅਤੇ ਲੋੜਵੰਦਾਂ ਲਈ ਰਾਸ਼ਨ ਦਾ ਪ੍ਰਬੰਧ ਕਰ ਰਿਹਾ ਹੈ। ਸਥਾਨਕ ਸਿਵਲ ਹਸਪਤਾਲ ਵਿੱਚ ਬਣਾਏ ਗਏ ਆਈਸੋਲੇਸ਼ਨ ਵਾਰਡ ਵਿੱਚ ਲੰਬਾ ਸਮਾਂ ਸਮਾਜਸੇਵੀ ਹੀ ਮਰੀਜ਼ਾਂ ਲਈ ਤਿੰਨ ਸਮੇਂ ਦਾ ਖਾਣਾ ਅਤੇ ਚਾਹ ਪਾਣੀ ਦਿੰਦੇ ਰਹੇ। ਊਨ੍ਹਾਂ ਇਹ ਿਨਸ਼ਕਾਮ ਸੇਵਾ ਕੀਤੀ। ਹੁਣ ਜਦੋਂ ਲੌਕਡਾਊਨ ਖਤਮ ਹੋ ਗਿਆ ਤਾਂ ਸੂਬਾ ਸਰਕਾਰ ਦੇ ਸਿਹਤ ਵਿਭਾਗ ਵੱਲੋਂ ਮਰੀਜ਼ਾਂ ਲਈ ਖਾਣਾ ਆਉਣ ਲੱਗ ਪਿਆ। ਦੋ ਦਿਨ ਪਹਿਲਾਂ ਖਾਣੇ ਦਾ ਰੌਲਾ ਪੈਣਾ ਸ਼ੁਰੂ ਹੋ ਗਿਆ ਕਿ ਮਰੀਜ਼ਾਂ ਲਈ ਭੇਜੇ ਖਾਣੇ ਦੇ ਕੰਟੀਨ ਵਾਲੇ ਨੂੰ ਪੈਸੇ ਨਹੀਂ ਮਿਲੇ ਅੱਕ ਕੇ ਉਸ ਨੇ ਖਾਣਾ ਦੇਣ ਤੋਂ ਇਨਕਾਰ ਕਰ ਦਿੱਤਾ। ਹਸਪਤਾਲ ਦੇ ਸੀਨੀਅਰ ਮੈਡੀਕਲ ਅਫਸਰ ਡਾ. ਸੁਖਜੀਵਨ ਕੱਕੜ ਨੇ ਆਪਣੇ ਤੌਰ ਤੇ ਕੰਟੀਨ ਵਾਲੇ ਨੂੰ ਖਾਣਾ ਨਿਰੰਤਰ ਭੇਜਣ ਲਈ ਸਮਝਾਇਆ। ਉਨ੍ਹਾਂ ਉਪ-ਮੰਡਲ ਮੈਜਿਸਰਟੇਟ ਨੂੰ ਇਸ ਮਾਮਲੇ ਤੋਂ ਜਾਣੂ ਕਰਵਾਇਆ। ਐੱਸਐੱਮਓ ਮੁਤਾਬਿਕ ਪ੍ਰਤੀ ਮਰੀਜ਼ 2 ਸੌ ਰੁਪਏ ਰੋਜ਼ਾਨਾ ਬਣਦੇ ਹਨ ਅਤੇ ਕੰਟੀਨ ਵਾਲੇ ਦਾ ਵਿਭਾਗ ਵੱਲ ਇੱਕ ਲੱਖ ਤੋਂ ਉਪਰ ਦਾ ਬਿੱਲ ਬਣ ਗਿਆ ਹੈ। ਕੰਟੀਨ ਠੇਕੇਦਾਰ ਰਾਮੂ ਨੇ ਜਦੋਂ ਹੱਥ ਖੜ੍ਹੇ ਕਰ ਦਿੱਤੇ ਤਾਂ ਐੱਸਡੀਐਮ ਦਫ਼ਤਰ ਵੱਲੋਂ ਉਸ ਨੂੰ 66 ਹਜ਼ਾਰ ਰੁਪਏ ਦਾ ਚੈੱਕ ਦੇ ਕੇ ਕੰਮ ਚਲਦਾ ਰੱਖ ਲਿਆ। ਸੀਨੀਅਰ ਮੈਡੀਕਲ ਅਫਸਰ ਡਾ. ਸੁਖਜੀਵਨ ਕੱਕੜ ਨੇ ਕੰਟੀਨ ਵਾਲੇ ਦਾ ਪਿਛਲੇ ਕਰੀਬ ਤਿੰਨ ਮਹੀਨਿਆਂ ਦਾ ਬਿੱਲ ਦਾ ਭੁਗਤਾਨ ਨਾ ਹੋਣ ਦੀ ਗੱਲ ਕਬੂਲ ਕੀਤੀ। ਹੁਣ ਸਰਕਾਰ ਦੀ ਕਾਰਗੁਜ਼ਾਰੀ ’ਤੇ ਪ੍ਰਸ਼ਨ ਚਿੰਨ੍ਹ ਲਗ ਗਿਆ ਹੈ।
