ਖੇਤਰੀ ਪ੍ਰਤੀਨਿਧ
ਲੁਧਿਆਣਾ, 13 ਜੁਲਾਈ
ਸਥਾਨਕ ਤਾਜਪੁਰ ਰੋਡ ਤੇ ਬੁੱਢੇ ਨਾਲੇ ਵਿੱਚ ਡਿਗਦੇ ਸੀਵਰੇਜ ਦਾ ਆਏ ਦਿਨ ਲੈਂਟਰ ਟੁੱਟਣ ਨਾਲ ਕਿਸੇ ਸਮੇਂ ਵੀ ਵੱਡਾ ਹਾਦਸਾ ਹੋ ਸਕਦਾ ਹੈ। ਆਸ-ਪਾਸ ਦੇ ਲੋਕਾਂ ਦੀ ਮੰਗ ਹੈ ਕਿ ਇਸ ਦਾ ਪੱਕਾ ਹਲ ਕਰਕੇ ਰਾਹਗੀਰਾਂ ਨੂੰ ਪੇਸ਼ ਆ ਰਹੀ ਮੁਸ਼ਕਲ ਦਾ ਹੱਲ ਕੀਤਾ ਜਾਵੇ। ਤਾਜਪੁਰ ਰੋਡ ’ਤੇ ਪੈਂਦੇ ਅਮਨ ਧਰਮ ਕੰਡੇ ਦੇ ਸਾਹਮਣੇ ਟਿੱਬਾ ਰੋਡ ਨੂੰ ਜਾਂਦੀ ਸੜਕ ’ਤੇ ਸੀਵਰੇਜ ਉਪਰ ਦਾ ਲੈਂਟਰ ਮੀਂਹ ਦੇ ਪਾਣੀ ਜਾਂ ਭਾਰੀ ਵਾਹਨਾਂ ਦੇ ਲੰਘਣ ਨਾਲ ਹੇਠਾਂ ਧਸ ਗਿਆ ਹੈ। ਰਾਤ ਸਮੇਂ ਕੋਈ ਵੀ ਵਾਹਨ ਅਤੇ ਖਾਸ ਕਰਕੇ ਦੋਪਹੀਆ ਵਾਹਨ ਚਾਲਕ ਦਾ ਜਾਨੀ ਨੁਕਸਾਨ ਹੋਣ ਦਾ ਡਰ ਬਣਿਆ ਹੋਇਆ ਹੈ। ਇਸ ਥਾਂ ’ਤੇ ਹੁਣ ਕਿਸੇ ਨੇ ਨਗਰ ਨਿਗਮ ਦੀ ਟਰਾਲੀ ਲਿਆ ਕੇ ਖੜ੍ਹੀ ਕਰ ਦਿੱਤੀ ਹੈ। ਇਸ ਸੜਕ ਤੋਂ ਰੋਜ਼ਾਨਾ ਲੰਘਣ ਵਾਲਿਆਂ ਦਾ ਕਹਿਣਾ ਸੀ ਕਿ ਇਸ ਤੋਂ ਪਹਿਲਾਂ ਵੀ ਕਈ ਵਾਰ ਇਹ ਲੈਂਟਰ ਟੁੱਟ ਚੁੱਕਿਆ ਹੈ। ਹੁਣ ਲੋਕਾਂ ਦੀ ਮੰਗ ਹੈ ਕਿ ਇਸ ਦਾ ਕੋਈ ਪੱਕਾ ਹੱਲ ਕੀਤਾ ਜਾਵੇ।
