ਪੱਤਰ ਪ੍ਰੇਰਕ
ਜਗਰਾਉਂ, 4 ਅਕਤੂਬਰ
ਪੁਲੀਸ ਥਾਣਾ ਹਠੂਰ ਦੇ ਪਿੰਡ ਭੰਮੀਪੁਰਾ ਨੇੜਿਉਂ ਸਕਾਰਪੀਓ ਗੱਡੀ ਖੋਹ ਲਈ ਗਈ ਜਿਸ ਕਾਰਨ ਪੁਲੀਸ ਨੇ ਅਣਪਛਾਤਿਆਂ ਖਿਲਾਫ ਕੇਸ ਦਰਜ ਕੀਤਾ ਹੈ। ਏ.ਐਸ.ਆਈ.ਜਗਜੀਤ ਸਿੰਘ ਅਤੇ ਪੀੜਤ ਸਤਵੀਰ ਸਿੰਘ ਪੁੱਤਰ ਹਰਨੇਕ ਸਿੰਘ ਵਾਸੀ ਪਿੰਡ ਭੰਮੀਪੁਰਾ (ਹਠੂਰ) ਨੇ ਦੱਸਿਆ ਕਿ ਸ੍ਰੀ ਰਾਮ ਕਾਲਜ ਡੱਲਾ ’ਚ ਪੜ੍ਹਨ ਵਾਲਾ ਇਹ ਵਿਦਿਆਰਥੀ ਸਤਵੀਰ ਸਿੰਘ ਸਕਾਰਪੀਓ ’ਤੇ ਜਾ ਰਿਹਾ ਸੀ । ਰਸਤੇ ’ਚ ਪੈਂਦੇ ਪਿੰਡ ਰਣਧੀਰਗੜ੍ਹ ਕੋਲ ਤਿੰਨ ਨੌਜਵਾਨ ਖੜ੍ਹੇ ਸਨ ਜਿਨ੍ਹਾ ਨੇ ਕਿਹਾ ਕਿ ਉਨ੍ਹਾਂ ਦਾ ਮੋਟਰਸਾਈਕਲ ਖਰਾਬ ਹੋ ਗਿਆ ਹੈ। ਸਤਵੀਰ ਗੱਡੀ ਖੜ੍ਹੀ ਕਰ ਉਨ੍ਹਾਂ ਦੀ ਮੱਦਦ ਲਈ ਹੇਠਾਂ ਉਤਰਿਆ, ਇਸ ਦੌਰਾਨ ਗੱਡੀ ਦੀ ਚਾਬੀ ਵੀ ਵਿੱਚ ਹੀ ਰਹਿ ਗਈ। ਉਤਰਨ ਸਾਰ ਹੀ ਦੋ ਨੌਜਵਾਨਾਂ ਨੇ ਸਤਵੀਰ ਨੂੰ ਫੜ ਲਿਆ ਅਤੇ ਉਸ ਦੀ ਕੁੱਟਮਾਰ ਸ਼ੁਰੂ ਕਰ ਦਿੱਤੀ। ਇਨ੍ਹਾਂ ਵਿਚੋਂ ਇਕ ਨੌਜਵਾਨ ਗੱਡੀ ਭਜਾ ਕੇ ਲੈ ਗਿਆ ਅਤੇ ਦੂਸਰੇ ਦੋਵੇਂ ਬਿਨਾਂ ਨੰਬਰੀ ਸਪਲੈਂਡਰ ਮੋਟਰਸਈਕਲ ’ਤੇ ਫਰਾਰ ਹੋ ਗਏ। ਏ.ਐਸ.ਆਈ.ਜਗਜੀਤ ਸਿੰਘ ਨੇ ਦੱਸਿਆ ਕਿ ਪੁਲੀਸ ਜਾਂਚ ਕਰ ਰਹੀ ਹੈ। ਪੀੜਤ ਪਰਿਵਾਰ ਨੇ ਪੁਲੀਸ ਨੂੰ ਦੱਸਿਆ ਹੈ ਕਿ ਚੋਰੀ ਹੋਣ ਵਾਲੀ ਗੱਡੀ ਸ਼੍ਰੀਰਾਮ ਫਾਇਨਾਂਸ ਕੰਪਨੀ ਤੋਂ ਕਰਜ਼ਾ ਲੈ ਕੇ ਲਈ ਹੋਈ ਹੈ,ਇਸ ਦੇ ਨਾਲ ਹੀ ਗੱਡੀ ਦੀਆਂ ਕੁੱਝ ਕਿਸ਼ਤਾਂ ਵੀ ਟੁੱਟੀਆਂ ਹੋਈਆਂ ਹਨ। ਪੁਲੀਸ ਅਧਿਕਾਰੀ ਨੇ ਆਖਿਆ ਕਿ ਮਸਲਾ ਜਲਦੀ ਸੁਲਝਾ ਲਿਆ ਜਾਵੇਗਾ।
