ਟ੍ਰਿਬਿਊਨ ਨਿਊਜ਼ ਸਰਵਿਸ
ਲੁਧਿਆਣਾ, 16 ਅਕਤੂਬਰ
ਪਿਛਲੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਕੈਪਟਨ ਅਮਰਿੰਦਰ ਸਿੰਘ ਕੌਫ਼ੀ ਵਿਦ ਕੈਪਟਨ ਦੀ ਸ਼ੁਰੂਆਤ ਕੀਤੀ ਸੀ। ਇਸ ਤੋਂ ਬਾਅਦ ਅੱਜ ਲੁਧਿਆਣਾ ਵਿੱਚ ਪੁੱਜੇ ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਨੇ ‘ਬ੍ਰੇਕਫਾਸਟ ਵਿਦ ਬਾਦਲ’ ਅਤੇ ਫਿਰ ਸ਼ਾਮ ਨੂੰ ‘ਕੌਫੀ ਵਿਦ ਯੂਥ’ ਦੇ ਨਾਲ ਨਵੀਂ ਮੁਹਿੰਮ ਦੀ ਸ਼ੁਰੂਆਤ ਕੀਤੀ। ਬ੍ਰੇਕਫਾਸਟ ਵਿਦ ਬਾਦਲ ਵਿੱਚ ਸੁਖਬੀਰ ਸਿੰਘ ਬਾਦਲ ਨੇ ਸਵੇਰੇ ਪਾਰਕ ਵਿੱਚ ਲੋਕਾਂ ਦੇ ਨਾਲ ਰਾਊਂਡ ਟੇਬਲ ’ਤੇ ਬ੍ਰੇਕਫਾਸਟ ਕੀਤਾ ਤੇ ਉਨ੍ਹਾਂ ਦੀ ਸਮੱਸਿਆਵਾਂ ਜਾਣੀਆਂ, ਨਾਲ ਹੀ ਲੋਕਾਂ ਦੇ ਸਵਾਲਾਂ ਦੇ ਜਵਾਬ ਵੀ ਦਿੱਤੇ। ਇਸ ਤੋਂ ਇਲਾਵਾ ਦੇਰ ਸ਼ਾਮ ਸਾਰੇ ਸਮਾਗਮ ਖਤਮ ਕਰਨ ਤੋਂ ਬਾਅਦ ‘ਕੌਫ਼ੀ ਵਿਦ ਯੂਥ’ ਦੇ ਲਈ ਉਹ ਕੌਫ਼ੀ ਪੀਣ ਲਈ ਲੁਧਿਆਣਾ ਦੇ ਪੌਸ਼ ਸਰਾਭਾ ਨਗਰ ਮਾਰਕੀਟ ਵਿੱਚ ਪੁੱਜੇ, ਜਿੱਥੇ ਉਨ੍ਹਾਂ ਨੇ ਕੌਫੀ ਸ਼ਾਪ ਵਿੱਚ ਬੈਠ ਕੇ ਕੌਫ਼ੀ ਪੀਤੀ ਤੇ ਨੌਜਵਾਨਾਂ ਨਾਲ ਗੱਲਾਂ ਕੀਤੀਆਂ। ਸ੍ਰੀ ਬਾਦਲ ਅੱਜ ਲੁਧਿਆਣਾ ਦੇ ਖਾਸ ਦੌਰੇ ’ਤੇ ਆਏ ਸਨ, ਉਨ੍ਹਾਂ ਨੇ ਪੂਰੇ ਦਿਨ ਵਿੱਚ 10 ਤੋਂ ਵੱਧ ਸਮਾਗਮਾਂ ਵਿੱਚ ਹਿੱਸਾ ਲਿਆ। ਇੱਥੇ ਉਨ੍ਹਾਂ ਨੇ ਸਭ ਤੋਂ ਪਹਿਲਾਂ ਬ੍ਰੇਕਫਾਸਟ ਵਿਦ ਬਾਦਲ ਦੀ ਸ਼ੁਰੂਆਤ ਸਵੇਰੇ 10 ਵਜੇ ਸਾਬਕਾ ਕੌਂਸਲਰ ਭੂਪਿੰਦਰ ਸਿੰਘ ਦੇ ਘਰ ਤੋਂ ਕੀਤੀ। ਇੱਥੇ ਪਾਰਕ ਵਿੱਚ ਬ੍ਰੇਕਫਾਸਟ ਪ੍ਰੋਗਰਾਮ ਲਈ ਪੂਰਾ ਸੈੱਟ ਲਗਾਇਆ ਗਿਆ ਸੀ। ਉਨ੍ਹਾਂ ਨੇ ਰਾਤ ਅੱਠ ਵਜੇ ਸਰਾਭਾ ਨਗਰ ਮਾਰਕੀਟ ਵਿੱਚ ਕੌਫੀ ਵਿਦ ਯੂਥ ਦੀ ਸ਼ੁਰੂਆਤ ਕੀਤੀ। ਇੱਥੇ ਉਨ੍ਹਾਂ ਯੂਥੇ ਨਾਲ ਕੌਫੀ ਪੀਤੀ ਤੇ ਚਰਚਾ ਕੀਤੀ।
