ਨਿੱਜੀ ਪੱਤਰ ਪ੍ਰੇਰਕ
ਲੁਧਿਆਣਾ, 18 ਜੁਲਾਈ
ਇੱਥੇ ਵੱਖ ਵੱਖ ਇਲਾਕਿਆਂ ਵਿੱਚ ਹੋਏ ਸੜਕ ਹਾਦਸਿਆਂ ਦੌਰਾਨ ਇੱਕ ਬਜ਼ੁਰਗ ਸਮੇਤ ਤਿੰਨ ਜਣੇ ਜ਼ਖ਼ਮੀ ਹੋ ਗਏ। ਥਾਣਾ ਡਿਵੀਜ਼ਨ ਨੰਬਰ ਅੱਠ ਦੀ ਪੁਲੀਸ ਨੂੰ ਮਹਿਮੂਦਪੁਰ ਵਾਸੀ ਸ਼ਿਵ ਕੁਮਾਰ (79 ਸਾਲ) ਨੇ ਦੱਸਿਆ ਹੈ ਕਿ ਉਹ ਆਟੋ ਰਿਕਸ਼ਾ ਵਿੱਚ ਜਾ ਰਹੇ ਸਨ ਤਾਂ ਡੀਐੱਮਸੀ ਰੋਡ ਨੇੜੇ ਕੇਵੀਐਮ ਸਕੂਲ ਕੋਲ ਜਿਪਸੀ ਚਾਲਕ ਨੇ ਤੇਜ਼ ਰਫ਼ਤਾਰੀ ਨਾਲ ਆਟੋ ਵਿੱਚ ਟੱਕਰ ਮਾਰੀ ਜਿਸ ਨਾਲ ਆਟੋ ਡਰਾਈਵਰ ਸਮੇਤ ਉਹ ਜ਼ਖ਼ਮੀ ਹੋ ਗਏ। ਜਿਪਸੀ ਡਰਾਈਵਰ ਜਿਪਸੀ ਨੰਬਰ ਐਚਆਰ 26ਜੀ 6734 ’ਤੇ ਫ਼ਰਾਰ ਹੋ ਗਿਆ। ਹਾਦਸੇ ਦੌਰਾਨ ਆਟੋ ਰਿਕਸ਼ਾ ਦਾ ਵੀ ਨੁਕਸਾਨ ਹੋਇਆ ਹੈ। ਥਾਣੇਦਾਰ ਮੋਹਨ ਸਿੰਘ ਨੇ ਦੱਸਿਆ ਹੈ ਕਿ ਪੁਲੀਸ ਵੱਲੋਂ ਕੇਸ ਦਰਜ ਕਰਕੇ ਮੁਲਜ਼ਮ ਦੀ ਭਾਲ ਕੀਤੀ ਜਾ ਰਹੀ ਹੈ। ਇਸੇ ਤਰ੍ਹਾਂ ਥਾਣਾ ਜਮਾਲਪੁਰ ਦੀ ਪੁਲੀਸ ਨੂੰ ਆਹਲੂਵਾਲੀਆ ਕਲੋਨੀ ਮੂੰਡੀਆਂ ਵਾਸੀ ਰਾਕੇਸ਼ ਰਾਏ ਨੇ ਦੱਸਿਆ ਹੈ ਕਿ ਉਸ ਦੇ ਮਾਮੇ ਦਾ ਪੁੱਤਰ ਨਰੇਸ਼ ਰਾਏ (32 ਸਾਲ) ਉਸ ਕੋਲ ਹੀ ਰਹਿੰਦਾ ਹੈ। ਉਹ ਚੰਡੀਗੜ੍ਹ ਰੋਡ ਨੇੜੇ ਐਸ ਫਾਈਵ ਹੋਟਲ ਸਾਹਮਣੇ ਸੜਕ ਪਾਰ ਕਰ ਰਿਹਾ ਸੀ ਤਾਂ ਬੁਲੇਟ ਮੋਟਰਸਾਈਕਲ ਨੇ ਉਸ ਵਿੱਚ ਟੱਕਰ ਮਾਰੀ। ਇਸ ਕਾਰਨ ਉਹ ਜ਼ਖਮੀ ਹੋ ਗਿਆ। ਉਸ ਨੂੰ ਓਸਵਾਲ ਹਸਪਤਾਲ ਦਾਖ਼ਲ ਕਰਾਇਆ ਗਿਆ ਹੈ। ਥਾਣੇਦਾਰ ਕੁਲਬੀਰ ਸਿੰਘ ਨੇ ਦੱਸਿਆ ਹੈ ਕਿ ਬੁਲੇਟ ਮੋਟਰਸਾਈਕਲ ਚਾਲਕ ਮੌਕੇ ਤੋਂ ਫ਼ਰਾਰ ਹੋ ਗਿਆ ਅਤੇ ਪੁਲੀਸ ਵੱਲੋਂ ਕੇਸ ਦਰਜ ਕਰਕੇ ਉਸ ਦੀ ਭਾਲ ਕੀਤੀ ਜਾ ਰਹੀ ਹੈ।
