ਪੱਤਰ ਪ੍ਰੇਰਕ
ਤਰਨ ਤਾਰਨ, 11 ਜੁਲਾਈ
ਇਥੋਂ ਦੇ ਪਿੰਡ ਕਾਜੀਕੋਟ ਖੁਰਦ ’ਚ ਸ਼ਨਿਚਰਵਾਰ ਨੂੰ ਸ਼ਾਮ ਵੇਲੇ ਕਾਰ ਸਵਾਰ ਨਕਾਬਪੋਸ਼ ਵਿਅਕਤੀਆਂ ਵੱਲੋਂ ਇਕ ਔਰਤ ’ਤੇ ਗੋਲੀਆਂ ਚਲਾ ਦਿੱਤੀਆਂ| ਔਰਤ ਲਈ ਇਹ ਘਟਨਾ ਇਕ ਭੇਤ ਬਣੀ ਹੋਈ ਹੈ| ਗੋਲੀਆਂ ਚਲਾਉਣ ਨਾਲ ਪਿੰਡ ਵਿੱਚ ਦਹਿਸ਼ਤ ਦਾ ਮਾਹੌਲ ਹੈ ਤੇ ਆਸ ਪਾਸ ਦੇ ਲੋਕਾਂ ਨੇ ਆਪਣੇ ਘਰਾਂ ਅੰਦਰ ਲੁਕ ਕੇ ਜਾਨ ਬਚਾਈ| ਪੀੜਤ ਔਰਤ 49 ਸਾਲਾ ਹਰਪ੍ਰੀਤ ਕੌਰ ਆਪਣੇ ਘਰ ’ਚ ਸ਼ਾਮ ਵੇਲੇ ਕੰਮ ਕਰ ਰਹੀ ਸੀ ਕਿ ਅਚਾਨਕ ਘਰ ਦੇ ਬਾਹਰ ਕਾਰ ਦੇ ਹਾਰਨ ਦੀ ਆਵਾਜ਼ ਆਈ| ਉਸ ਨੇ ਬਾਹਰ ਆ ਕੇ ਦੇਖਿਆ ਤਾਂ ਇਕ ਨਵੀਂ (ਏਐੱਫ) ਫਾਰਚੂਨਰ ਗੱਡੀ ਵਿੱਚੋਂ ਤਿੰਨ ਨਕਾਬਪੋਸ਼ ਹਥਿਆਰਬੰਦ ਵਿਅਕਤੀ ਹੇਠਾਂ ਉੱਤਰੇ ਤੇ ਉਨ੍ਹਾਂ ਦਾ ਇਕ ਸਾਥੀ ਡਰਾਈਵਰ ਸੀਟ ’ਤੇ ਬੈਠਾ ਰਿਹਾ| ਨਕਾਬਪੋਸ਼ਾਂ ਨੇ ਹਰਪ੍ਰੀਤ ਕੌਰ ਵੱਲ ਪੰਜ-ਛੇ ਗੋਲੀਆਂ ਚਲਾ ਦਿੱਤੀਆਂ ਪਰ ਉਹ ਵਾਲ ਵਾਲ ਬਚ ਗਈ| ਉਸ ਨੇ ਦੌੜ ਕੇ ਘਰ ਅੰਦਰ ਲੁਕ ਕੇ ਆਪਣੀ ਜਾਨ ਬਚਾਈ| ਗੋਲੀਆਂ ਲੱਗਣ ਨਾਲ ਉਸ ਦੀ ਕਾਰ ਦਾ ਨੁਕਸਾਨ ਹੋਇਆ ਹੈ| ਨਕਾਬਪੋਸ਼ ਵਾਰਦਾਤ ਕਰਨ ਮਗਰੋਂ ਮੌਕੇ ਤੋਂ ਫਰਾਰ ਹੋ ਗਏ| ਹਰਪ੍ਰੀਤ ਕੌਰ ਇਕ ਘਰੇਲੂ ਔਰਤ ਹੈ ਤੇ ਉਸ ਦਾ ਪਤੀ ਖੇਤੀਬਾੜੀ ਕਰਦਾ ਹੈ| ਕੇਸ ਦੀ ਜਾਂਚ ਕਰਦੇ ਏਐੱਸਆਈ ਹਰਪਾਲ ਸਿੰਘ ਨੇ ਦੱਸਿਆ ਕਿ ਘਟਨਾ ਦੇ ਕਾਰਨਾਂ ਦਾ ਪਤਾ ਲਾਇਆ ਜਾ ਰਿਹਾ ਹੈ| ਇਸ ਸਬੰਧੀ ਦਫ਼ਾ 307, 506 ਆਦਿ ਫੌਜਦਾਰੀ ਧਾਰਾਵਾਂ, 25, 27, 54, 59 ਅਸਲਾ ਐਕਟ ਅਧੀਨ ਕੇਸ ਦਰਜ ਕੀਤਾ ਗਿਆ ਹੈ।
