ਪੱਤਰ ਪੇ੍ਰਕ
ਪਠਾਨਕੋਟ, 23 ਅਕਤੂਬਰ
ਅੱਜ ਸਵੇਰੇ ਪਠਾਨਕੋਟ-ਜਲੰਧਰ ਨੈਸ਼ਨਲ ਹਾਈਵੇਅ ਮਾਰਗ ’ਤੇ ਹਿਲਟਾਪ ਦੁਰਗਾ ਮਾਤਾ ਮੰਦਿਰ ਡਮਟਾਲ ਕੋਲ ਇੱਕ ਟਰੱਕ ਜੋ ਕਿ ਸੜਕ ’ਤੇ ਰੋਡ ਮਾਰਕਿੰਗ ਪੇਂਟ ਦਾ ਕੰਮ ਕਰ ਰਿਹਾ ਸੀ, ਅਚਾਨਕ ਉਸ ਵਿੱਚ ਰੱਖੀ ਭੱਠੀ ਨੂੰ ਅੱਗ ਲੱਗਣ ਨਾਲ ਟਰੱਕ ਨੂੰ ਅੱਗ ਲੱਗ ਗਈ। ਇਸ ਅੱਗ ਨਾਲ ਉਥੇ ਟਰੱਕ ਵਿੱਚ ਹੀ ਰੱਖੇ ਗਏ ਐਲਪੀਜੀ ਗੈਸ ਦੇ 2 ਸਿਲੰਡਰ ਫਟ ਗਏ ਅਤੇ ਜ਼ੋਰ ਦੀ ਧਮਾਕਾ ਹੋਇਆ। ਅੱਗ ਨਾਲ ਮਿੰਟਾਂ ਵਿੱਚ ਹੀ ਟਰੱਕ ਸੜ ਕੇ ਸਵਾਹ ਹੋ ਗਿਆ। ਪਠਾਨਕੋਟ ਨਗਰ ਨਿਗਮ ਅਤੇ ਕੰਦਰੋੜੀ ਤੋਂ ਆਰਮੀ ਦੀਆਂ ਫਾਇਰ ਬ੍ਰਿਗੇਡ ਗੱਡੀਆਂ ਨੇ ਮੌਕੇ ’ਤੇ ਪੁੱਜ ਕੇ ਅੱਗ ਨੂੰ ਬੁਝਾ ਦਿੱਤਾ। ਇਸ ਨਾਲ ਨੈਸ਼ਨਲ ਹਾਈਵੇਅ ਤੇ ਅੱਧਾ ਘੰਟਾ ਤੋਂ ਵੱਧ ਟ੍ਰੈਫਿਕ ਰੁਕਿਆ ਰਿਹਾ। ਥਾਣਾ ਮੁਖੀ ਹਰੀਸ਼ ਗੁਲੇਰੀਆ ਨੇ ਦੱਸਿਆ ਕਿ ਇਸ ਅੱਗ ਵਿੱਚ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ।
