ਪੱਤਰ ਪ੍ਰੇਰਕ
ਤਰਨ ਤਾਰਨ, 26 ਜੂਨ
ਤਿੰਨ ਹਥਿਆਰਬੰਦ ਲੁਟੇਰੇ ਇਕ ਗਰੀਬ ਸਬਜ਼ੀ ਉਤਪਾਦਕ ਕੋਲੋਂ ਉਸ ਦੀ ਐਕਟਿਵਾ ਖੋਹ ਕੇ ਲੈ ਗਏ| ਸਬਜ਼ੀ ਉਤਪਾਦਕ ਸੁਖਵਿੰਦਰ ਸਿੰਘ ਐਕਟਿਵਾ ਪੀ ਬੀ- 46, ਏਐਫ਼-0643 ’ਤੇ ਆਪਣੇ ਪਿੰਡ ਪਿੱਦੀ ਤੋਂ ਭਿੰਡੀਤੋਰੀ ਦੀ ਫਸਲ ਬੋਰੀ ਵਿੱਚ ਲੈ ਕੇ ਇਥੋਂ ਦੀ ਸਬਜ਼ੀ ਮੰਡੀ ਵਿੱਚ ਵੇਚਣ ਲਈ ਲੈ ਕੇ ਆ ਰਿਹਾ ਸੀ ਕਿ ਉਸ ਨੂੰ ਕੌਮੀ ਸ਼ਾਹ ਮਾਰਗ ਨੰਬਰ 54 ਤੇ ਅਲਾਦੀਨਪੁਰ ਦੇ ਫਲਾਈਓਵਰ ਤੇ ਤਿੰਨ ਹਥਿਆਰਬੰਦ ਲੁਟੇਰਿਆਂ ਨੇ ਘੇਰ ਕੇ ਪਿਸਤੌਲ ਦੀ ਨੋਕ ’ਤੇ ਉਸ ਦੀ ਐਕਟਿਵਾ ਖੋਹ ਲਈ ਤੇ ਫਰਾਰ ਹੋ ਗਏ| ਲੁਟੇਰਿਆਂ ਉਸ ਨੂੰ ਰੌਲਾ ਪਾਉਣ ’ਤੇ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦਿੱਤੀਆਂ| ਇਸ ਸਬੰਧੀ ਸਥਾਨਕ ਥਾਣਾ ਸਦਰ ਦੀ ਪੁਲੀਸ ਨੇ ਦਫ਼ਾ 379ਬੀ ਅਧੀਨ ਕੇਸ ਦਰਜ ਕੀਤਾ ਹੈ|
ਚੋਰੀ ਦੀ ਕਾਰ ਤੇ ਅਸਲੇ ਸਮੇਤ ਇਕ ਕਾਬੂ
ਤਰਨ ਤਾਰਨ (ਪੱਤਰ ਪ੍ਰੇਰਕ): ਸਥਾਨਕ ਥਾਣਾ ਸਿਟੀ ਦੀ ਪੁਲੀਸ ਨੇ ਇਥੋਂ ਦੇ ਪੁਰਾਣੇ ਬਾਈਪਾਸ ਤੋਂ ਇਕ ਗਿਅਕਤੀ ਨੂੰ ਚੋਰੀ ਦੀ ਕਾਰ ਤੇ ਅਸਲੇ ਸਮੇਤ ਗ੍ਰਿਫਤਾਰ ਕੀਤਾ ਹੈ| ਪੁਲੀਸ ਨੇ ਦੱਸਿਆ ਕਿ ਮੁਲਜ਼ਮ ਦੀ ਸ਼ਨਾਖਤ ਲਵਪ੍ਰੀਤ ਸਿੰਘ ਵਾਸੀ ਧਰਮਕੋਟ (ਮੋਗਾ) ਦੇ ਤੌਰ ’ਤੇ ਕੀਤੀ ਗਈ ਹੈ| ਮੁਲਜ਼ਮ ਨੇ ਚੋਰੀ ਕੀਤੀ ਆਈ-20 ਕਾਰ ਤੇ ਜਾਅਲੀ ਨੰਬਰ ਪਲੇਟ ਲਗਾਈ ਹੋਈ ਸੀ| ਉਸ ਕੋਲੋਂ ਕਾਰ ਤੋਂ ਇਲਾਵਾ ਇਕ ਦੇਸੀ ਪਿਸਤੌਲ ਅਤੇ ਚਾਰ ਕਾਰਤੂਸ ਬਰਾਮਦ ਕੀਤੇ ਗਏ ਹਨ| ਇਸ ਸਬੰਧੀ ਲੋੜੀਂਦੀਆਂ ਧਾਰਾਵਾਂ ਅਧੀਨ ਕੇਸ ਦਰਜ ਕੀਤਾ ਗਿਆ ਹੈ।
