ਪੱਤਰ ਪ੍ਰੇਰਕ
ਪਠਾਨਕੋਟ, 18 ਸਤੰਬਰ
ਭਾਰਤੀ ਸੈਨਾ ਦੀ 10 ਜੈਕ ਰਾਈਫਲਜ਼ ਯੂਨਿਟ ਦੇ ਸ਼ਹੀਦ ਅਜੈ ਸਲਾਰੀਆ ਦਾ 6ਵਾਂ ਸ਼ਰਧਾਂਜਲੀ ਸਮਾਗਮ ਸ਼ਹੀਦ ਸੈਨਿਕ ਪਰਿਵਾਰ ਸੁਰੱਖਿਆ ਪਰਿਸ਼ਦ ਦੇ ਪ੍ਰਧਾਨ ਕਰਨਲ ਸਾਗਰ ਸਿੰਘ ਸਲਾਰੀਆ ਦੀ ਅਗਵਾਈ ਵਿੱਚ ਪਿੰਡ ਦਰਸ਼ੋਪੁਰ ਵਿੱਚ ਕੀਤਾ ਗਿਆ। ਇਸ ਵਿੱਚ ਅਕਾਲੀ ਦਲ ਬਾਦਲ ਦੇ ਜ਼ਿਲ੍ਹਾ ਅਬਜ਼ਰਵਰ ਰਾਜ ਕੁਮਾਰ ਗੁਪਤਾ ਬਤੌਰ ਮੁੱਖ ਮਹਿਮਾਨ ਵੱਜੋਂ ਸ਼ਾਮਲ ਹੋਏ। ਇਨ੍ਹਾਂ ਦੇ ਇਲਾਵਾ ਸ਼ਹੀਦ ਦੀ ਮਾਤਾ ਕਿਰਨ ਠਾਕੁਰ, ਪਿਤਾ ਕੈਪਟਨ ਰਛਪਾਲ ਸਿੰਘ ਸਲਾਰੀਆ, ਭੈਣ ਨੀਰੂ ਠਾਕੁਰ, ਜੀਜਾ ਐਸਆਈ ਸੰਦੀਪ ਸਿੰਘ, ਪ੍ਰੀਸ਼ਦ ਦੇ ਜਨਰਲ ਸਕੱਤਰ ਕੁੰਵਰ ਰਵਿੰਦਰ ਸਿੰਘ ਵਿੱਕੀ, ਡਿਪਟੀ ਡੀਈਓ ਠਾਕੁਰ ਰਾਜੇਸ਼ਵਰ ਸਲਾਰੀਆ, ਚਾਰ ਪੈਰਾ ਸਪੈਸ਼ਲ ਫੋਰਸ ਯੂਨਿਟ ਦੇ ਕੈਪਟਨ ਨਿਖਿਲ ਕੁਮਾਰ, ਪ੍ਰਿੰਸੀਪਲ ਰੇਣੁਕਾ ਕਟੋਚ, ਐਸਡੀਓ ਨਰੇਸ਼ ਤ੍ਰਿਪਾਠੀ ਆਦਿ ਹਾਜ਼ਰ ਹੋਏ। ਸ਼ਹੀਦ ਅਜੇ ਸਲਾਰੀਆ ਦੀ ਮਾਤਾ ਕਿਰਨ ਠਾਕੁਰ ਨੇ ਸ਼ਹੀਦ ਬੇਟੇ ਦੇ ਚਿੱਤਰ ਦੇ ਮੂਹਰੇ ਸ਼ਮਾ ਰੋਸ਼ਨ ਅਤੇ ਪੁਸ਼ਪਾਂਜਲੀ ਅਰਪਿਤ ਕਰ ਕੇ ਸਮਾਗਮ ਦਾ ਆਗਾਜ਼ ਕੀਤਾ। ਸੈਨਾ ਦੀ 9 ਜੈਕ ਰਾਈਫਲਜ਼ ਯੂਨਿਟ ਦੇ ਜਵਾਨਾਂ ਨੇ ਬਿਗੁਲ ਦੀ ਗੌਰਵਸ਼ਾਲੀ ਧੁਨ ਦੇ ਨਾਲ ਸ਼ਹੀਦ ਨੂੰ ਸਲਾਮੀ ਦਿੱਤੀ।
