ਇਕਬਾਲ ਸਿੰਘ ਸ਼ਾਂਤ
ਲੰਬੀ, 23 ਜੁਲਾਈ
ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਦੀ ਤਾਜਪੋਸ਼ੀ ਦੌਰਾਨ ਅੱਜ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੇ ਚੋਣ ਹਲਕੇ ਲੰਬੀ ਵਿਚੋਂ ਕਾਂਗਰਸ ਨਾਲੋਂ ਅਲਹਿਦਗੀ ਦਾ ਸੁਨੇਹਾ ਆਇਆ ਹੈ, ਜਿਸ ਤਹਿਤ ਲੰਬੀ ਹਲਕੇ ਦੇ ਸਾਬਕਾ ਜ਼ਿਲ੍ਹਾ ਕਾਂਗਰਸ ਪ੍ਰਧਾਨ ਗੁਰਮੀਤ ਸਿੰਘ ਖੁੱਡੀਆਂ ਨੇ ਪਾਰਟੀ ਨੂੰ ਛੱਡਣ ਦਾ ਐਲਾਨ ਕਰ ਦਿੱਤਾ। ਖੁੱਡੀਆਂ ਨੇ ਇਹ ਐਲਾਨ ਆਪਣੇ ਜੱਦੀ ਪਿੰਡ ਖੁੱਡੀਆਂ ਵਿਖੇ ਗੁਰਦੁਆਰੇ ਦੇ ਵਿਹੜੇ ਵਿਚ ਵਰਕਰਾਂ ਦੇ ਇਕੱਠ ਮੌਕੇ ਕੀਤਾ। ਗੁਰਮੀਤ ਖੁੱਡੀਆਂ ਵਿੱਚ ਲੰਮੇ ਸਮੇਂ ਤੋਂ ਕਾਂਗਰਸ ਸਰਕਾਰ ਵਿਚ ਚੇਅਰਮੈਨੀ ਜਾਂ ਕੋਈ ਸਨਮਾਨਤ ਸਿਆਸੀ ਅਹੁਦਾ ਨਾ ਦਿੱਤੇ ਜਾਣ ਕਰਕੇ ਨਾਮੋਸ਼ ਸਨ। ਖੁੱਡੀਆਂ ਵੱਲੋਂ ਕਾਂਗਰਸ ਪਾਰਟੀ ਨੂੰ ਅਲਵਿਦਾ ਕਹਿਣ ਮੌਕੇ ਮੌਜੂਦ ਇਕੱਠ ਦੀ ਗਿਣਤੀ ਕਰੀਬ ਸਾਢੇ ਤਿੰਨ ਸੌ ਤੋਂ ਚਾਰ ਸੌ ਤੱਕ ਦੱਸੀ ਜਾਂਦੀ ਹੈ। ਗੁਰਮੀਤ ਖੁੱਡੀਆਂ ਦਾ ਦਾਅਵਾ ਹੈ ਕਿ ਉਨ੍ਹਾਂ ਨੂੰ ਲੰਬੀ ਹਲਕੇ ਵਿੱਚ 45 ਪਿੰਡਾਂ ਦੇ ਕਾਂਗਰਸੀ ਸਰਪੰਚਾਂ ਦਾ ਸਮਰਥਨ ਹਾਸਲ ਹੈ। ਇਸ ਦੌਰਾਨ ਲੰਬੀ ਹਲਕਾ ਕਾਂਗਰਸ ਦੇ ਥੰਮ ਆਗੂ ਮਹੇਸ਼ਇੰਦਰ ਸਿੰਘ ਬਾਦਲ ਨੇ ਕਿਹਾ ਕਿ ਗੁਰਮੀਤ ਸਿੰਘ ਖੁੱਡੀਆਂ ਦਾ ਕਾਂਗਰਸ ਤੋਂ ਜਾਣਾ ਬੇਹੱਦ ਦੁਖਦਾਈ ਹੈ।
