ਪੱਤਰ ਪ੍ਰੇਰਕ
ਸਾਦਿਕ, 29 ਅਕਤੂਬਰ
ਇੱਥੋਂ ਨੇੜਲੇ ਪਿੰਡ ਢਿੱਲਵਾਂ ਖੁਰਦ ਵਿਚ ਅੱਗ ਲੱਗਣ ਕਾਰਨ ਲੱਖਾਂ ਰੁਪਏ ਦੀ ਪਰਾਲੀ ਸੜ ਗਈ। ਜਾਣਕਾਰੀ ਅਨੁਸਾਰ ਇਸੇ ਕਿਸਾਨ ਲਖਵਿੰਦਰ ਸਿੰਘ ਕੋਲ ਪਰਾਲੀ ਦੀਆਂ ਗੱਠਾਂ ਬੰਨ੍ਹਣ ਵਾਲੀ ਮਸ਼ੀਨ ਹੈ। ਉਸ ਨੇ ਕਰੀਬ ਸੌ ਏਕੜ ਰਕਬੇ ਦੀਆਂ ਗੱਠਾਂ ਬੰਨ੍ਹ ਕੇ ਆਪਣੇ ਖੇਤ ਵਿੱਚ ਡੰਪ ਕੀਤੀਆਂ ਸਨ। ਇਨ੍ਹਾਂ ਗੱਠਾਂ ਨੂੰ ਅਚਾਨਕ ਅੱਗ ਲੱਗ ਗਈ। ਇਲਾਕੇ ਦੇ ਲੋਕਾਂ ਤੇ ਅੱਗ ਬੁਝਾਊ ਗੱਡੀਆਂ ਰਾਹੀਂ ਅੱਗ ਬੁਝਾਉਣ ਲਈ ਜੱਦੋ-ਜਹਿਦ ਦੇ ਬਾਵਜੂਦ ਅੱਗ ’ਤੇ ਕਾਬੂ ਨਹੀਂ ਪਾਇਆ ਜਾ ਸਕਿਆ। ਅੱਗ ਬੁਝਾਊ ਅਮਲੇ ਅਤੇ ਲੋਕਾਂ ਨੇ ਮੁਸ਼ਕਿਲ ਨਾਲ ਪਰਾਲੀ ਦਾ ਕੁੱਝ ਹਿੱਸਾ ਪਾਸੇ ਲਿਜਾ ਕੇ ਬਚਾਇਆ। ਇਸ ਨੁਕਸਾਨ ਬਾਰੇ ਗੱਲਬਾਤ ਕਰਦਿਆਂ ਕਿਸਾਨ ਲਖਵਿੰਦਰ ਸਿੰਘ ਨੇ ਦੱਸਿਆ ਕਿ ਇਸ ਹਾਦਸੇ ਕਾਰਨ ਉਸ ਦਾ ਕਰੀਬ ਚਾਰ ਲੱਖ ਤੋਂ ਵੀ ਵਧੇਰੇ ਮੁੱਲ ਦੀ ਪਰਾਲੀ ਦਾ ਨੁਕਸਾਨ ਹੋ ਗਿਆ।
