ਲਖਵੀਰ ਸਿੰਘ ਚੀਮਾ
ਟੱਲੇਵਾਲ, 14 ਜੂਨ
ਥਾਣਾ ਟੱਲੇਵਾਲ ਦੇ ਅਧੀਨ ਪੈਂਦੇ ਪਿੰਡ ਗਾਗੇਵਾਲ ਅਤੇ ਛੀਨੀਵਾਲ ਖ਼ੁਰਦ ਵਿੱਚ ਲਗਾਤਾਰ ਦੋ ਰਾਤਾਂ ਦਰਮਿਆਨ ਚੋਰੀ ਦੀਆਂ ਘਟਨਾਵਾਂ ਹੋਈਆਂ। ਗਾਗੇਵਾਲ ਵਿੱਚ ਚੋਰਾਂ ਵਲੋਂ ਦੋ ਘਰਾਂ ਵਿੱਚੋਂ ਮੋਟਰਸਾਈਕਲ, ਨਕਦੀ ਅਤੇ ਮੋਬਾਈਲ ਚੋਰੀ ਕੀਤੇ ਗਏ ਹਨ। ਪਿੰਡ ਦੇ ਮਹਿੰਦਰ ਸਿੰਘ ਦੇ ਘਰੋਂ ਚੋਰਾਂ ਨੇ 5 ਹਜ਼ਾਰ ਰੁਪਏ ਤੇ ਮੋਟਰਸਾਈਕਲ ਚੋਰੀ ਕਰ ਲਿਆ। ਬਸੀਰ ਖਾਨ ਦੇ ਘਰੋਂ ਦੋ ਮੋਬਾਈਲ ਚੋਰੀ ਕਰ ਲਏ। ਪੀੜਤ ਜਦੋਂ ਥਾਣਾ ਟੱਲੇਵਾਲ ਸ਼ਿਕਾਇਤ ਦਰਜ ਕਰਵਾਉਣ ਜਾ ਰਹੇ ਸਨ ਤਾਂ ਮਹਿੰਦਰ ਸਿੰਘ ਦਾ ਚੋਰੀ ਕੀਤਾ ਗਿਆ ਮੋਟਰਸਾਈਕਲ ਪਿੰਡ ਸੱਦੋਵਾਲ ਦੇ ਬੱਸ ਅੱਡੇ ’ਤੇ ਖੜਾ ਮਿਲਿਆ। ਮੋਟਰਸਾਈਕਲ ਦੀ ਟੁੱਟੀ ਹੈੱਡ ਲਾਈਟ ਅਤੇ ਬਸੀਰ ਖਾਨ ਦਾ ਇਕ ਚੋਰੀ ਹੋਇਆ ਮੋਬਾਈਲ ਵੀ ਬਰਾਮਦ ਹੋਇਆ। ਉਧਰ ਬੀਤੀ ਰਾਤ ਛੀਨੀਵਾਲ ਖ਼ੁਰਦ ਵਿੱਚ ਇੱਕ ਹੂਟਰ ਮਾਰਦੀ ਗੱਡੀ ’ਤੇ ਆਏ ਚੋਰਾਂ ਨੇ 2 ਘਰਾਂ ਵਿੱਚ ਚੋਰੀ ਕੀਤੀ ਜਦੋਂ ਕਿ ਤੀਜੇ ਘਰ ਪਤਾ ਲੱਗਣ ’ਤੇ ਰੌਲਾ ਪੈ ਗਿਆ ਅਤੇ ਚੋਰ ਭੱਜ ਗਏ। ਪਿੰਡ ਦੇ ਗੁਰਮੁੱਖ ਸਿੰਘ ਦੇ ਘਰੋਂ ਚੋਰ 2 ਮੋਬਾਈਲ, 3 ਹਜ਼ਾਰ ਰੁਪਏ ਅਤੇ ਮਹਿੰਦਰ ਸਿੰਘ ਦੇ ਘਰੋਂ ਮੋਬਾਈਲ ਘਰ ਚੋਰੀ ਕਰ ਕੇ ਲੈ ਗਏ। ਜਦੋਂ ਚੋਰ ਬੁੱਧ ਸਿੰਘ ਦੇ ਘਰ ਚੋਰੀ ਕਰਨ ਗਏ ਤਾਂ ਘਰ ਦੀਆਂ ਔਰਤਾਂ ਨੂੰ ਪਤਾ ਲੱਗ ਗਿਆ। ਇਸ ਸਬੰਧੀ ਐੱਸਐੱਚਓ ਦਲਵਿੰਦਰ ਸਿੰਘ ਨੇ ਕਿਹਾ ਕਿ ਪੁਲੀਸ ਵੱਲੋਂ ਰਾਤ ਸਮੇਂ ਬਾਕਾਇਦਾ ਗਸ਼ਤ ਕੀਤੀ ਜਾਂਦੀ ਹੈ।
