ਨਵੀਂ ਦਿੱਲੀ: ਹਰਿਆਣਵੀ ਔਰਤਾਂ ਨੇ ਖ਼ੁਦ ਟਰੈਕਟਰ ਚਲਾ ਕੇ ਮਾਰਚ ਵਿੱਚ ਸ਼ਮੂਲੀਅਤ ਕੀਤੀ ਅਤੇ ਮਹਿਲਾ ਸ਼ਕਤੀ ਦਾ ਪ੍ਰਗਟਾਵਾ ਕੀਤਾ। ਇਨ੍ਹਾਂ ਔਰਤਾਂ ਨੇ ਟਰੈਕਟਰਾਂ ਨੂੰ ਉਸੇ ਤਰ੍ਹਾਂ ਤਿਆਰ ਕੀਤਾ ਹੋਇਆ ਸੀ ਜਿਵੇਂ ਕਿਸਾਨਾਂ ਅਤੇ ਨੌਜਵਾਨਾਂ ਨੇ ਟਰੈਕਟਰ ਸ਼ਿੰਗਾਰੇ ਹੋਏ ਸਨ। ਪੰਜਾਬ ਤੋਂ ਬਾਅਦ ਹੁਣ ਹਰਿਆਣਵੀ ਔਰਤਾਂ ਨੇ ਵੀ ਦੱਸ ਦਿੱਤਾ ਕਿ ਕੇਂਦਰ ਸਰਕਾਰ ਦੇ ਕਾਨੂੰਨਾਂ ਦਾ ਵਿਰੋਧ ਉਹ ਵੀ ਕਰ ਰਹੀਆਂ ਹਨ। ਹਰਿਆਣਾ ’ਚ ਔਰਤਾਂ ਨੇ ਟਰੈਕਟਰ ਚਲਾਉਣ ਦੀ ਉਚੇਚੇ ਤੌਰ ’ਤੇ ਸਿਖਲਾਈ ਵੀ ਲਈ ਸੀ। ਬਾਰਡਰਾਂ ਉਪਰ ਚੱਲ ਰਹੀਆਂ ਲੜੀਵਾਰ ਭੁੱਖ ਹੜਤਾਲਾਂ ਵਿੱਚ ਵੀ ਔਰਤਾਂ ਸ਼ਾਮਲ ਹੋ ਰਹੀਆਂ ਹਨ। ਕਈ ਔਰਤਾਂ ਅਤੇ ਮਹਿਲਾ ਆਗੂਆਂ ਵੱਲੋਂ ਧਰਨਿਆਂ ਦੌਰਾਨ ਜੋਸ਼ੀਲੇ ਭਾਸ਼ਨ ਦੇ ਕੇ ਮੋਦੀ ਸਰਕਾਰ ਨੂੰ ਕਰਾਰੇ ਹੱਥੀਂ ਲਿਆ ਜਾ ਰਿਹਾ ਹੈ। ਧਰਨਿਆਂ ਵਿੱਚ ਸ਼ਾਮਲ ਹੋਣ ਲਈ ਔਰਤਾਂ ਪਰਿਵਾਰਾਂ ਸਮੇਤ ਵੱਖ-ਵੱਖ ਸੂਬਿਆਂ ਤੋਂ ਪਹੁੰਚੀਆਂ ਹੋਈਆਂ ਹਨ। ਕਈ ਪਰਵਾਸੀ ਭਾਰਤੀ ਔਰਤਾਂ ਵੀ ਧਰਨਿਆਂ ਦੇ ਗੇੜੇ ਲਾ ਚੁੱਕੀਆਂ ਹਨ। ਔਰਤਾਂ ਵੱਲੋਂ ਮੋਰਚੇ ’ਚ ਲੰਗਰ ਬਣਾਉਣ ਅਤੇ ਸਟੇਜ ਸੰਭਾਲਣ ਆਦਿ ਜਿਹੇ ਕੰਮ ਕਰਦੇ ਵੀ ਦੇਖਿਆ ਜਾ ਸਕਦਾ ਹੈ।
ਸਬੰਧਿਤ ਖ਼ਬਰਾਂ
