ਮਹਿਸਾਣਾ, 12 ਅਕਤੂਬਰ
Five labourers killed: ਗੁਜਰਾਤ ਦੇ ਜ਼ਿਲ੍ਹਾ ਮਹਿਸਾਣਾ ਵਿਚ ਸ਼ਨਿੱਚਰਵਾਰ ਨੂੰ ਉਸਾਰੀ ਵਾਲੀ ਇਕ ਥਾਂ ਪੁਟਾਈ ਕਰਦੇ ਸਮੇਂ ਢਿੱਗਾਂ ਡਿੱਗ ਜਾਣ ਕਾਰਨ ਮਿੱਟੀ ਹੇਠ ਦੱਬ ਕੇ ਘੱਟੋ-ਘੱਟ ਪੰਜ ਮਜ਼ਦੂਰਾਂ ਦੀ ਮੌਤ ਹੋ ਗਈ, ਜਦੋਂਕਿ ਹੋਰ ਕਈਆਂ ਦੇ ਢਿੱਗਾਂ ਹੇਠ ਦੱਬੇ ਹੋਣ ਦਾ ਖ਼ਦਸ਼ਾ ਹੈ।
ਪੁਲੀਸ ਨੇ ਇਹ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਇਹ ਘਟਨਾ ਜ਼ਿਲ੍ਹਾ ਸਦਰ ਮੁਕਾਮ ਤੋਂ ਕਰੀਬ 37 ਕਿਲੋਮੀਟਰ ਦੂਰ ਕਡੀ ਕਸਬੇ ਵਿਚ ਵਾਪਰੀ ਹੈ। ਦੱਸਿਆ ਜਾਂਦਾ ਹੈ ਕਿ ਕਈ ਮਜ਼ਦੂਰ ਜਾਸਲਪੁਰ ਪਿੰਡ ਵਿਚ ਜ਼ਮੀਨਦੋਜ਼ ਹੌਦ ਬਣਾਏ ਜਾਣ ਲਈ ਖੱਡੇ ਦੀ ਪੁਟਾਈ ਕਰ ਰਹੇ ਸਨ, ਜਦੋਂ ਉਨ੍ਹਾਂ ਉਤੇ ਇਕ ਪਾਸੇ ਤੋਂ ਮਿੱਟੀ ਡਿੱਗਣੀ ਸ਼ੁਰੂ ਹੋ ਗਈ ਤੇ ਉਹ ਉਸ ਹੇਠਾਂ ਦੱਬ ਗਏ।
ਇਕ ਪੁਲੀਸ ਅਧਿਕਾਰੀ ਨੇ ਕਿਹਾ, ‘‘ਪੰਜ ਲਾਸ਼ਾਂ ਕੱਢ ਲਈਆਂ ਗਈਆਂ ਹਨ ਤੇ ਹੋਰ ਤਿੰਨ-ਚਾਰ ਮਜ਼ਦੂਰਾਂ ਦੇ ਦੱਬੇ ਹੋਣ ਦਾ ਖ਼ਦਸ਼ਾ ਹੈ। ਬਚਾਅ ਕਾਰਜ ਵੱਡੇ ਪੱਧਰ ’ਤੇ ਜਾਰੀ ਹਨ।’’ -ਪੀਟੀਆਈ
