ਸ੍ਰੀਨਗਰ, 12 ਸਤੰਬਰ
ਜੰਮੂ ਕਸ਼ਮੀਰ ਦੇ ਬਾਰਾਮੁੱਲਾ ਜ਼ਿਲ੍ਹੇ ਵਿੱਚ ਬੱਦਲ ਫੱਟਣ ਕਾਰਨ ਇੱਕ ਟੱਪਰੀਵਾਸ ਪਰਿਵਾਰ ਦੇ ਤਿੰਨ ਨਾਬਾਲਗਾਂ ਸਣੇ ਚਾਰ ਜੀਆਂ ਦੀ ਮੌਤ ਹੋ ਗਈ। ਅਧਿਕਾਰੀਆਂ ਨੇ ਅੱਜ ਦੱਸਿਆ ਕਿ ਉਤਰੀ ਕਸ਼ਮੀਰ ਜ਼ਿਲ੍ਹੇ ਦੇ ਸੋਪੋਰ ਖੇਤਰ ਵਿੱਚ ਹਮਾਮ ਮਾਰਕੂਟ ਵਿਖੇ ਦਾਂਗੀਵਾਚਾ ਦੀ ਉਪਰਲੀ ਪੱਟੀ ਵਿੱਚ ਸ਼ਨਿੱਚਰਵਾਰ ਰਾਤ ਨੂੰ ਬੱਦਲ ਫਟੇ। ਉਨ੍ਹਾਂ ਦੱਸਿਆ ਕਿ ਪੁਲੀਸ ਅਤੇ ਸੂਬਾ ਆਫ਼ਤ ਬਚਾਅ ਬਲ (ਐੱਸਡੀਆਰਐੱਫ) ਦੀ ਟੀਮ ਨੇ ਘਟਨਾ ਸਥਾਨ ’ਤੇ ਪਹੁੰਚ ਕੇ ਚਾਰ ਲਾਸ਼ਾਂ ਬਰਾਮਦ ਕੀਤੀਆਂ ਹਨ। ਪੁਲੀਸ ਮੁਤਾਬਕ ਮ੍ਰਿਤਕਾਂ ਦੀ ਪਛਾਣ ਮੁਹੰਮਦ ਤਾਰਿਕ ਖਾਰੀ (ਅੱਠ), ਸ਼ਹਿਨਾਜ਼ ਬੇਗ਼ਮ (30), ਨਾਜ਼ੀਆ ਅਖ਼ਤਰ (14) ਅਤੇ ਆਰਿਫ਼ ਹੁਸੈਨ ਖਾਰੀ (ਪੰਜ) ਵਾਸੀ ਕਾਲਸੀਆਂ ਨੌਸ਼ਿਹਰਾ ਵਜੋਂ ਹੋਈ ਹੈ। ਇਹ ਖੇਤਰ ਜੰਮੂ ਖੇਤਰ ਦੇ ਰਾਜੌਰੀ ਵਿੱਚ ਪੈਂਦਾ ਹੈ। ਉਨ੍ਹਾਂ ਦੱਸਿਆ ਕਿ ਪਰਿਵਾਰ ਦਾ ਇੱਕ ਹੋਰ ਮੈਂਬਰ ਮੁਹੰਮਦ ਬਸ਼ੀਰ ਖਾਰੀ (80) ਲਾਪਤਾ ਹੈ। ਉਸ ਦੀ ਭਾਲ ਕੀਤੀ ਜਾ ਰਹੀ ਹੈ। -ਪੀਟੀਆਈ
