ਤਿਰੂਵਨੰਤਪੁਰਮ, 2 ਮਈ
ਕੇਰਲਾ ਵਿਧਾਨ ਸਭਾ ਚੋਣਾਂ ’ਚ ਭਾਜਪਾ (ਐਨਡੀਏ) ਨੇ ਪਿਛਲੀ ਵਾਰ ਜਿੱਤੀ ਆਪਣੀ ਇੱਕ ਸੀਟ ਵੀ ਗੁਆ ਲਈ ਹੈ। ਜ਼ਿਕਰਯੋਗ ਹੈ ਕਿ ਭਾਜਪਾ ਦੀ ਅਗਵਾਈ ਵਿਚ ਐਨਡੀਏ ਨੇ 35 ਸੀਟਾਂ ਜਿੱਤਣ ਦਾ ਦਾਅਵਾ ਕੀਤਾ ਸੀ। ਭਾਜਪਾ ਨੇ ਇਸ ਵਾਰ ਆਪਣਾ ਇਕੋ-ਇਕ ਹਲਕਾ ਨੀਮੋਮ ਵੀ ਗੁਆ ਲਿਆ ਤੇ ਉਸ ਦੇ ਪ੍ਰਮੁੱਖ ਆਗੂ ‘ਮੈਟਰੋਮੈਨ’ ਈ. ਸ੍ਰੀਧਰਨ ਤੇ ਪਾਰਟੀ ਮੁਖੀ ਕੇ. ਸੁਰੇਂਦਰਨ ਵੀ ਚੋਣ ਜਿੱਤਣ ਵਿਚ ਅਸਫ਼ਲ ਰਹੇ। ਸੀਪੀਐਮ ਆਗੂ ਤੇ ਐਲਡੀਐਫ ਉਮੀਦਵਾਰ ਵੀ. ਸਿਵਾਨਕੁੱਟੀ ਨੇ ਇਹ ਸੀਟ 3,949 ਵੋਟਾਂ ਦੇ ਫ਼ਰਕ ਨਾਲ ਜਿੱਤ ਲਈ ਹੈ। ਭਾਜਪਾ ਲਈ ਇਹ ਸੀਟ ਵੱਕਾਰ ਦਾ ਸਵਾਲ ਬਣੀ ਹੋਈ ਸੀ। ਚੋਣਾਂ ਤੋਂ ਇਕ ਹਫ਼ਤਾ ਪਹਿਲਾਂ ਹੀ ਮੁੱਖ ਮੰਤਰੀ ਪਿਨਾਰਈ ਵਿਜਯਨ ਨੇ ਕਿਹਾ ਸੀ ਕਿ ਸੀਪੀਐਮ ਇਸ ਵਾਰ ਕੇਰਲਾ ਵਿਚ ਭਾਜਪਾ ਦਾ ਖਾਤਾ ਬੰਦ ਕਰ ਦੇਵੇਗੀ। -ਪੀਟੀਆਈ
