ਟ੍ਰਿਬਿਊਨ ਨਿਊਜ਼ ਸਰਵਿਸ
ਬੱਲਬਗੜ੍ਹ, 12 ਅਗਸਤ
ਗ੍ਰੇਟਰ ਫਰੀਦਾਬਾਦ ਦੇ ਪਿੰਡ ਜਸਾਨਾ ਵਿੱਚ ਦਿਨ-ਦਿਹਾੜੇ ਪਤੀ-ਪਤਨੀ ਦਾ ਕਤਲ ਕਰ ਦਿੱਤਾ ਗਿਆ। ਪਿੰਡ ਜਸਾਨਾ ਵਿੱਚ ਪਤਨੀ ਮੋਨਿਕਾ ਅਤੇ ਪਤੀ ਸੁਖਬੀਰ ਦੇ ਹੱਥ-ਪੈਰ ਬੰਨ੍ਹ ਕੇ ਕਤਲ ਕਰ ਦਿੱਤਾ ਗਿਆ। ਦੋਹਰੇ ਕਤਲ ਤੋਂ ਬਾਅਦ ਪਿੰਡ ਵਿੱਚ ਦਹਿਸ਼ਤ ਦਾ ਮਾਹੌਲ ਹੈ। ਇਸ ਦੇ ਨਾਲ ਹੀ ਡੀਸੀਪੀ ਮਕਸੂਦ ਅਹਿਮਦ, ਏਸੀਪੀ ਕ੍ਰਾਈਮ ਅਨਿਲ ਕੁਮਾਰ, ਏਸੀਪੀ ਤਿਗਾਂਵ, ਐੱਸਐਚਓ ਤਿਗਾਂਵ ਤੋਂ ਇਲਾਵਾ ਕ੍ਰਾਈਮ ਬ੍ਰਾਂਚ, ਫੋਰੈਂਸਿਕ ਮਾਹਰ ਮੌਕੇ ’ਤੇ ਪਹੁੰਚ ਗਏ ਹਨ। ਕਤਲ ਦੇ ਕਾਰਨਾਂ ਦਾ ਪਤਾ ਨਹੀਂ ਲੱਗਿਆ। ਤਿਗਾਂਵ ਥਾਣੇ ਦੇ ਇੰਚਾਰਜ ਜਸਵੀਰ ਅਨੁਸਾਰ ਮੋਨਿਕਾ ਹਰ ਸ਼ਾਮ ਆਪਣੇ ਪੇਕੇ ਘਰੋਂ ਦੁੱਧ ਲੈਣ ਜਾਂਦੀ ਸੀ। ਮੰਗਲਵਾਰ ਸ਼ਾਮ ਨੂੰ ਜਦੋਂ ਉਹ 9 ਵਜੇ ਤੱਕ ਵੀ ਦੁੱਧ ਲੈਣ ਨਹੀਂ ਆਈ ਤਾਂ ਪਰਿਵਾਰ ਵਾਲੇ ਡੋਲੂ ਲੈ ਕੇ ਉਸ ਦੇ ਘਰ ਪਹੁੰਚੇ। ਉਥੇ ਪਹੁੰਚਦਿਆਂ ਹੀ ਉਸ ਦੇ ਪੈਰਾਂ ਹੇਠੋਂ ਜ਼ਮੀਨ ਖਿਸਕ ਗਈ। ਦੋਵੇਂ ਪਤੀ ਦੇ ਹੱਥ-ਪੈਰ ਬੰਨ੍ਹੇ ਹੋਏ ਸਨ ਅਤੇ ਚਾਰੇ ਪਾਸੇ ਲਹੂ ਫੈਲ ਗਿਆ ਸੀ। ਇਸ ਤੋਂ ਬਾਅਦ ਪੁਲੀਸ ਨੂੰ ਸੂਚਿਤ ਕੀਤਾ ਗਿਆ। ਸੀਸੀਟੀਵੀ ਫੁਟੇਜ ਵੇਖ ਕੇ ਪਤਾ ਲੱਗਿਆ ਕਿ 2 ਮੋਟਰਸਾਈਕਲਾਂ ‘ਤੇ 4 ਬਦਮਾਸ਼ ਆਏ ਸਨ। ਘਰ ਵਿੱਚੋਂ ਕੁਝ ਚੀਜ਼ਾਂ ਵੀ ਮੌਕੇ ਤੋਂ ਗਾਇਬ ਹਨ।
