ਨਵੀਂ ਦਿੱਲੀ: ਮਹਾਰਾਸ਼ਟਰ ਦੇ ਸਾਬਕਾ ਡੀਜੀਪੀ ਸੁਬੋਧ ਕੁਮਾਰ ਜੈਸਵਾਲ ਨੇ ਅੱਜ ਕੇਂਦਰੀ ਉਦਯੋਗਿਕ ਸੁਰੱਖਿਆ ਬਲ (ਸੀਆਈਐੱਸਐੱਫ) ਦੇ ਨਵੇਂ ਮੁਖੀ ਵਜੋਂ ਚਾਰਜ ਸੰਭਾਲ ਲਿਆ ਹੈ। 1985 ਬੈਚ ਦੇ ਆਈਪੀਐੱਸ ਅਧਿਕਾਰੀ ਜੈਸਵਾਲ ਨੂੰ ਕੇਂਦਰੀ ਦਿੱਲੀ ਵਿੱਚ ਲੋਧੀ ਰੋਡ ’ਤੇ ਸੀਆਈਐੱਸਐੱਫ ਦੇ ਮੁੱਖ ਦਫ਼ਤਰ ਵਿੱਚ 28ਵੇਂ ਮੁਖੀ ਵਜੋਂ ਅਹੁਦਾ ਸੰਭਾਲਿਆ। ਇਸ ਤੋਂ ਪਹਿਲਾਂ ਇੱਕ ਪ੍ਰੋਗਰਾਮ ਦੌਰਾਨ ਉਨ੍ਹਾਂ ਨੂੰ ਗਾਰਡ ਆਫ ਆਨਰ ਦਿੱਤਾ ਗਿਆ। ਕੇਂਦਰ ਸਰਕਾਰ ਨੇ 28 ਫਰਵਰੀ 2019 ਤੋਂ ਮਹਾਰਾਸ਼ਟਰ ਪੁਲੀਸ ਦੇ ਮੁਖੀ ਚੱਲੇ ਆ ਰਹੇ 58 ਸਾਲਾ ਜੈਸਵਾਲ ਦੀ 1.62 ਲੱਖ ਜਵਾਨਾਂ ਵਾਲੇ ਮਜ਼ਬੂਤ ਨੀਮ ਫੌਜੀ ਬਲ (ਸੀਆਈਐੱਸਐੱਫ) ਦੇ ਡੀਜੀ ਵਜੋਂ ਨਿਯੁਕਤੀ ਪਿਛਲੇ ਮਹੀਨੇ ਕੀਤੀ ਸੀ। ਉਨ੍ਹਾਂ ਦਾ ਕਾਰਜਕਾਲ ਸਤੰਬਰ 2022 ਤੱਕ ਰਹੇਗਾ।
-ਪੀਟੀਆਈ
