ਕਾਨਪੁਰ, 19 ਅਗਸਤ
ਕਾਨਪੁਰ ਦੇ ਗੋਵਿੰਦਪੁਰੀ ਸਟੇਸ਼ਨ ਨੇੜੇ ਸਾਬਰਮਤੀ ਐਕਸਪ੍ਰੈੱਸ ਰੇਗ ਗੱਡੀ ਦੇ ਡੱਬੇ ਪਟੜੀ ਤੋਂ ਉਤਰਨ ਦੇ ਮਾਮਲੇ ਵਿੱਚ ਰੇਲਵੇ ਅਧਿਕਾਰੀਆਂ ਨੇ ਕਥਿਤ ਭੰਨ-ਤੋੜ ਲਈ ਅਣਪਛਾਤੇ ਲੋਕਾਂ ਖ਼ਿਲਾਫ਼ ਐੱਫਆਈਆਰ ਦਰਜ ਕੀਤੀ ਹੈ। ਰੇਲਵੇ ਅਧਿਕਾਰੀਆਂ ਨੇ ਕਿਹਾ ਕਿ ਇੰਜਣ ਦੇ ‘ਟਰੈਕ ’ਤੇ ਰੱਖੀ ਵਸਤੂ’ ਨਾਲ ਟਕਰਾਉਣ ਮਗਰੋਂ ਅਹਿਮਾਦਾਬਾਦ ਜਾਣ ਵਾਲੀ ਸਾਬਰਮਤੀ ਐਕਸਪ੍ਰੈੱਸ ਯਾਤਰੂ ਰੇਲ ਗੱਡੀ ਦੇ 20 ਡੱਬੇ ਸ਼ਨਿੱਚਰਵਾਰ ਸਵੇਰੇ ਕਾਨਪੁਰ ਦੇ ਗੋਵਿੰਦਪੁਰੀ ਸਟੇਸ਼ਨ ਨੇੜੇ ਪਟੜੀ ਤੋਂ ਉੱਤਰ ਗਏ ਸੀ।
ਏਡੀਸੀਪੀ (ਪੱਛਮੀ) ਵਿਜੇਂਦਰ ਦਿਵੇਦੀ ਨੇ ਅੱਜ ਇੱਥੇ ਦੱਸਿਆ ਕਿ ਸ਼ਨਿਚਰਵਾਰ ਨੂੰ ਐੱਫਆਈਆਰ ਦਰਜ ਕੀਤੀ ਗਈ। ਐੱਫਆਈਆਰ ਅਨੁਸਾਰ ਅੱਪ ਅਤੇ ਡਾਊਨ ਲਾਈਨਾਂ ਵਿਚਕਾਰ ਰੇਲ ਦੀ ਪੁਰਾਣੀ ਪਟੜੀ ਦਾ 0.93 ਮੀਟਰ ਲੰਬਾ ਟੁਕੜਾ ਮਿਲਿਆ ਸੀ ਅਤੇ ਅਜਿਹਾ ਜਾਪਦਾ ਹੈ ਕਿ ਇਸ ਦੀ ਟੱਕਰ ਕਾਰਨ 20 ਡੱਬੇ ਪਟੜੀ ਤੋਂ ਉੱਤਰ ਗਏ। ਰੇਲਵੇ ਦੇ ਸੀਨੀਅਰ ਸੈਕਸ਼ਨ ਇੰਜਨੀਅਰ ਮਹੇਂਦਰ ਪ੍ਰਤਾਪ ਸਿੰਘ ਦੀ ਸ਼ਿਕਾਇਤ ’ਤੇ ਪਣਕੀ ਪੁਲੀਸ ਨੇ ਐੱਫਆਈਆਰ ਦਰਜ ਕੀਤੀ ਹੈ। -ਪੀਟੀਆਈ