ਹੈਦਰਾਬਾਦ, 22 ਮਾਰਚ
ਤੇਲੰਗਾਨਾ ਦੇ ਸੂਰਿਆਪੇਟ ਜ਼ਿਲ੍ਹੇ ਵਿੱਚ ਅੱਜ 47ਵੇਂ ਜੂਨੀਅਰ ਨੈਸ਼ਨਲ ਕਬੱਡੀ ਟੂਰਨਾਮੈਂਟ ਤੋਂ ਐਨ ਪਹਿਲਾਂ ਆਰਜ਼ੀ ਖੇਡ ਗੈਲਰੀ ਦਾ ਹਿੱਸਾ ਡਿੱਗਣ ਨਾਲ 50 ਦੇ ਕਰੀਬ ਵਿਅਕਤੀ ਜ਼ਖ਼ਮੀ ਹੋ ਗਏ। ਸਾਰੇ ਜ਼ਖ਼ਮੀਆਂ ਨੂੰ ਹਸਪਤਾਲ ਦਾਖ਼ਲ ਕਰਵਾਇਆ ਗਿਆ ਹੈ ਤੇ ਇਨ੍ਹਾਂ ’ਚੋਂ ਪੰਜ ਤੋਂ ਛੇ ਜਣਿਆਂ ਦੀਆਂ ਹੱਡੀਆਂ ਟੁੱਟਣ ਦੀਆਂ ਵੀ ਰਿਪੋਰਟਾਂ ਹਨ। ਪੁਲੀਸ ਨੇ ਕਿਹਾ ਕਿ ਖੇਡ ਗੈਲਰੀ ਦਾ ਢਾਂਚਾ ਲੱਕੜ ਤੇ ਹੋਰ ਚੀਜ਼ਾਂ ਦਾ ਬਣਿਆ ਹੋਣ ਕਰਕੇ ਕਮਜ਼ੋਰ ਸੀ, ਪਰ ਹਾਦਸੇ ਦੇ ਅਸਲ ਕਾਰਨਾਂ ਦਾ ਪਤਾ ਜਾਂਚ ਮਗਰੋਂ ਹੀ ਲੱਗੇਗਾ। ਸਥਾਨਕ ਟੀਵੀ ਨਿਊਜ਼ ਚੈਨਲਾਂ ਵੱਲੋਂ ਵਿਖਾਈਆਂ ਤਸਵੀਰਾਂ ’ਚ ਲੋਕ ਗੈਲਰੀ ਤੋਂ ਹੇਠਾਂ ਡਿੱਗਦੇ ਵਿਖਾਈ ਦੇ ਰਹੇ ਹਨ। ਡੀਐੱਸਪੀ ਆਰ.ਭਾੋਸਕਰਨ ਨੇ ਕਿਹਾ ਕਿ ਗੈਲਰੀ ਤੇ ਹਸਪਤਾਲ ਦੋਵਾਂ ਥਾਵਾਂ ’ਤੇ ਹਾਲਾਤ ਦੀ ਨਿਗਰਾਨੀ ਕੀਤੀ ਜਾ ਰਹੀ ਹੈ। -ਪੀਟੀਆਈ
