ਗਾਜ਼ੀਆਬਾਦ, 11 ਸਤੰਬਰ
ਕਵੀ ਨਗਰ ਥਾਣਾ ਦੀ ਪੁਲੀਸ ਨੇ ਗਾਜ਼ੀਆਬਾਦ ਵਿੱਚ ਇੱਕ ਹੁੱਕਾ ਬਾਰ ’ਤੇ ਛਾਪਾ ਮਾਰ ਕੇ 6 ਲੜਕੀਆਂ ਸਣੇ 22 ਜਣਿਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਪੁਲੀਸ ਮੁਤਾਬਕ ਰਾਜ ਨਗਰ ਜ਼ਿਲ੍ਹਾ ਸੈਂਟਰ ’ਚ ਇਹ ਹੁੱਕਾ ਬਾਰੇ ਚੋਰੀ-ਛਿਪੇ ਚਲਾਈ ਜਾ ਰਹੀ ਸੀ। ਡੀਐੈੱਸਪੀ ਅੰਸ਼ੂ ਜੈਨ ਨੇ ਦੱਸਿਆ ਕਿ ਪੁਲੀਸ ਨੇ ਸੂਹ ਦੇ ਆਧਾਰ ’ਤੇ ਹਾਰਟ ਬੀਟ ਨੈਕਸਟ ਕੈਫੇ ’ਤੇ ਦੁਪਹਿਰ ਲੱਗਪਗ 2.30 ਵਜੇ ਛਾਪਾ ਮਾਰਿਆ ਅਤੇ ਉੱਥੋਂ 22 ਜਣਿਆਂ ਜਿਨ੍ਹਾਂ ਵਿੱਚ 6 ਲੜਕੀਆਂ ਵੀ ਸ਼ਾਮਲ ਹਨ, ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਇਸ ਤੋਂ ਇਲਾਵਾ ਤੰਬਾਕੂਨੋਸ਼ੀ ਦਾ ਹੋਰ ਸਾਮਾਨ ਵੀ ਬਰਾਮਦ ਹੋਇਆ ਹੈ। ਉਨ੍ਹਾਂ ਦੱਸਿਆ ਕਿ ਮੌਕੇ ਤੋਂ 9 ਹੁੱਕੇ, 14 ਤੰਬਕੂਨੋਸ਼ੀ ਕੌਇਲ ਅਤੇ ਵੱਖ-ਵੱਖ ਕਿਸਮ ਦਾ ਤੰਬਾਕੂ ਬਰਾਮਦ ਕੀਤਾ ਹੈ। ਡੀਐੱਸਪੀ ਮੁਤਾਬਕ ਹੁੱਕਾ ਬਾਰ ਦੇ ਇੱਕ ਅਪਰੇਟਰ ਸਮੀਰ ਖਾਨ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ, ਜਦਕਿ ਦੋ ਹੋਰ ਅਪਰੇਟਰ ਜਾਵੇਦ ਅਤੇ ਮੋਹਿਤ ਹਾਲੇ ਫਰਾਰ ਹਨ। -ਪੀਟੀਆਈ
