ਨਵੀਂ ਦਿੱਲੀ, 1 ਅਕਤੂਬਰ
ਸੀਨੀਅਰ ਆਈਪੀਐੱਸ ਅਧਿਕਾਰੀਆਂ ਸੁਜੌਏ ਲਾਲ ਥਾਓਸੇਨ ਅਤੇ ਅਨੀਸ਼ ਦਿਆਲ ਸਿੰਘ ਨੂੰ ਕ੍ਰਮਵਾਰ ਸੀਆਰਪੀਐੱਫ ਤੇ ਆਈਟੀਬੀਪੀ ਦਾ ਨਵਾਂ ਡਾਇਰੈਕਟਰ ਜਨਰਲ ਨਿਯੁਕਤ ਕੀਤਾ ਗਿਆ ਹੈ। ਇਹ ਜਾਣਕਾਰੀ ਅੱਜ ਜਾਰੀ ਇੱਕ ਸਰਕਾਰੀ ਹੁਕਮ ਵਿੱਚ ਦਿੱਤੀ ਗਈ। ਮੱਧ ਪ੍ਰਦੇਸ਼ ਕਾਡਰ ਦੇ 1988 ਦੇ ਬੈਚ ਦੇ ਅਧਿਕਾਰੀ ਥਾਓਸੇਨ ਇਸ ਸਮੇਂ ਸਸ਼ਤਰ ਸੀਮਾ ਬਲ (ਐੱਸਐੱਸਬੀ) ਦੇ ਡਾਇਰੈਕਟਰ ਜਨਰਲ ਹਨ ਤੇ ਉਨ੍ਹਾਂ ਕੋਲ ਆਈਟੀਬੀਪੀ ਦਾ ਵਾਧੂ ਕਾਰਜਭਾਰ ਹੈ। ਜਦਕਿ ਮਨੀਪੁਰ ਦੇ 1988 ਬੈਚ ਦੇ ਆਈਪੀਐੱਸ ਅਧਿਕਾਰੀ ਅਨੀਸ਼ ਦਿਆਲ ਸਿੰਘ ਇਸੇ ਸਮੇਂ ਇੰਟੈਲੀਜੈਂਸ ਬਿਊਰੋ ਦੇ ਸਪੈਸ਼ਲ ਡਾਇਰੈਕਟਰ ਵਜੋਂ ਸੇੇਵਾਵਾਂ ਨਿਭਾਅ ਰਹੇ ਹਨ। ਦੱਸਣਯੋਗ ਹੈ ਸੀਆਰਪੀਐੱਫ ਡਾਇਰੈਕਟਰ ਜਨਰਲ ਦਾ ਅਹੁਦਾ ਸ਼ੁੱਕਰਵਾਰ ਨੂੰ ਆਈਪੀਐੈੱਸ ਅਧਿਕਾਰੀ ਕੁਲਦੀਪ ਸਿੰਘ ਦੇ ਸੇਵਾਮੁਕਤ ਹੋਣ ਕਾਰਨ ਖਾਲੀ ਹੋਇਆ ਹੈ। ਉਕਤ ਨਿਯੁਕਤੀਆਂ ਦੇ ਹੁਕਮ ਪ੍ਰਸੋਨਲ ਮੰਤਰਾਲੇ ਵੱਲੋਂ ਜਾਰੀ ਕੀਤੇ ਗਏ ਹਨ। -ਪੀਟੀਆਈ
