ਨਵੀਂ ਦਿੱਲੀ, 19 ਅਗਸਤ
ਪੂਰਬੀ ਲੱਦਾਖ ਵਿੱਚ ਪਿਛਲੇ ਤਿੰਨ ਮਹੀਨਿਆਂ ਤੋਂ ਭਾਰਤ ਤੇ ਚੀਨ ਦੀਆਂ ਫੌਜਾਂ ਦਰਮਿਆਨ ਜਾਰੀ ਤਲਖੀ ਮਗਰੋਂ ਫੌਜਾਂ ਪਿੱਛੇ ਹਟਾਉਣ ਦੇ ਜਾਰੀ ਅਮਲ ਦੌਰਾਨ ਦੋਵੇਂ ਮੁਲਕ ਵੀਰਵਾਰ ਨੂੰ ਸਫ਼ਾਰਤੀ ਪੱਧਰ ਦੀ ਅਗਲੇ ਗੇੜ ਦੀ ਗੱਲਬਾਤ ਕਰ ਸਕਦੇ ਹਨ। ਇਹ ਦਾਅਵਾ ਇਸ ਪੂਰੇ ਘਟਨਾਕ੍ਰਮ ਤੋਂ ਜਾਣੂ ਸੂਤਰਾਂ ਨੇ ਕੀਤਾ ਹੈੈ। ਵਰਚੁਅਲ ਪੱਧਰ ਦੀ ਇਹ ਗੱਲਬਾਤ ਸਰਹੱਦੀ ਮਾਮਲਿਆਂ ਬਾਰੇ ਡਬਲਿਊਐੱਮਸੀਸੀ ਦੇ ਢਾਂਚੇ ਤਹਿਤ ਹੋਵੇਗੀ। ਸੂਤਰਾਂ ਮੁਤਾਬਕ ਦੋਵੇਂ ਧਿਰਾਂ ਫੌਜਾਂ ਨੂੰ ਟਕਰਾਅ ਵਾਲੇ ਖੇਤਰਾਂ ’ਚੋਂ ਪਿੱਛੇ ਹਟਾਉਣ ਦੇ ਅਮਲ ਨੂੰ ਛੇਤੀ ਤੋਂ ਛੇਤੀ ਯਕੀਨੀ ਬਣਾਉਣ ਦੇ ਢੰਗ ਤਰੀਕੇ ’ਤੇ ਗੱਲਬਾਤ ਕਰ ਸਕਦੀਆਂ ਹਨ। ਇਸ ਦੌਰਾਨ ਚੀਨ ਨੇ ਨੇਪਾਲ ਨਾਲ ਲਿਪੂਲੇਖ ਖੇਤਰ ’ਚ ਲੱਗਦੀ ਆਪਣੀ ਸਰਹੱਦ ’ਤੇ ਫੌਜ ਦੀ ਨਫਰੀ ਵਧਾ ਦਿੱਤੀ ਹੈ। ਚੇਤੇ ਰਹੇ ਕਿ ਨੇਪਾਲ ਲਿੱਪੂਲੇਖ ਨੂੰ ਵਿਵਾਦਿਤ ਖੇਤਰ ਦੱਸਦਾ ਆਇਆ ਹੈ। ਨੇਪਾਲ ਵੱਲੋਂ ਜਾਰੀ ਨਵੇਂ ਨਕਸ਼ੇ ਵਿੱਚ ਇਸ ਨੂੰ ਆਪਣੇ ਖੇਤਰ ਵਜੋਂ ਦਰਸਾਇਆ ਗਿਆ ਹੈ ਜਦੋਂਕਿ ਭਾਰਤ ਲੰਮੇ ਸਮੇਂ ਤੋਂ ਇਸ ਨੂੰ ਆਪਣਾ ਖੇਤਰ ਦੱਸਦਾ ਆਇਆ ਹੈ।
-ਪੀਟੀਆਈ