ਉਨਾਓ, 17 ਮਈ
ਇੱਥੋਂ ਦੇ ਪਿੰਡ ਸਿੱਧਰਪੁਰ ਵਿੱਚ ਅੱਜ ਸਵੇਰੇ ਲਖਨਊ-ਆਗਰਾ ਐਕਸਪ੍ਰੈੱਸਵੇਅ ’ਤੇ ਬੱਸ ਪਲਟਣ ਕਾਰਨ ਤਿੰਨ ਵਿਅਕਤੀਆਂ ਦੀ ਮੌਤ ਹੋ ਗਈ ਅਤੇ 25 ਜਣੇ ਜ਼ਖ਼ਮੀ ਹੋ ਗਏ। ਐੱਸਡੀਐੱਮ ਅੰਕਿਤ ਸ਼ੁਕਲਾ ਨੇ ਦੱਸਿਆ ਕਿ ਜੈਪੁਰ ਤੋਂ ਬਿਹਾਰ ਜਾ ਰਹੀ ਇਸ ਡਬਲ-ਡੈੱਕਰ ਬੱਸ ਵਿੱਚ 80-85 ਲੋਕ ਸਵਾਰ ਸਨ। ਬੱਸ ਜਦੋਂ ਪਿੰਡ ਸਿੱਧਰਪੁਰ ਨੇੜੇ ਪਹੁੰਚੀ ਤਾਂ ਸੰਤੁਲਨ ਵਿਗੜਨ ਕਾਰਨ ਪਲਟ ਗਈ। ਉਨ੍ਹਾਂ ਦੱਸਿਆ ਕਿ ਦੋ ਜਣਿਆਂ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ ਅਤੇ ਇੱਕ ਨੇ ਹਸਪਤਾਲ ਜਾ ਕੇ ਦਮ ਤੋੜ ਦਿੱਤਾ। ਮ੍ਰਿਤਕਾਂ ’ਚੋਂ ਇੱਕ ਦੀ ਪਛਾਣ ਰਾਕੇਸ਼ ਠਾਕੁਰ (35) ਵਾਸੀ ਬਿਹਾਰ ਵਜੋਂ ਹੋਈ ਹੈ। ਮ੍ਰਿਤਕਾਂ ਦੀਆਂ ਲਾਸ਼ਾਂ ਪੋਸਟਮਾਰਟਮ ਲਈ ਹਸਪਤਾਲ ਭੇਜ ਦਿੱਤੀਆਂ ਗਈਆਂ ਹਨ। 25 ਜ਼ਖ਼ਮੀਆਂ ’ਚੋਂ ਕੁੱਝ ਨੂੰ ਕਾਨਪੁਰ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਹੈ ਅਤੇ ਕੁੱਝ ਦਾ ਬਾਂਗਰਮਾਊ ਸਿਹਤ ਕੇਂਦਰ ਵਿੱਚ ਇਲਾਜ ਚੱਲ ਰਿਹਾ ਹੈ। -ਪੀਟੀਆਈ
