ਖੇਤਰੀ ਪ੍ਰਤੀਨਿਧ
ਪਟਿਆਲਾ, 8 ਮਾਰਚ
ਇੰਡੋ-ਤਿੱਬਤੀਅਨ ਬਾਰਡਰ ਪੁਲੀਸ ਫੋਰਸ ਦੀ 51ਵੀਂ ਬਟਾਲੀਅਨ ਵੱਲੋਂ ‘ਆਜ਼ਾਦੀ ਕਾ ਅੰਮ੍ਰਿਤ ਮਹਾਂਉਤਸਵ: ਦੇਸ਼ ਦੀ ਰਾਸ਼ਟਰ-ਸੁਰੱਖਿਆ ਦੀ ਰਾਖੀ’ ਦੇ ਤਹਿਤ ਇੱਥੇ ਪਟਿਆਲਾ ਦੇ ਸ੍ਰੀ ਕਾਲੀ ਮਾਤਾ ਮੰਦਰ ਨੇੜੇ ਸਥਿਤ ਪੁਲੀਸ ਯਾਦਗਾਰ ਵਿੱਚ ਆਈਟੀਬੀਪੀ ਦੇ ਬੈਂਡ ਦੇ ਅਧਿਕਾਰੀਆਂ ਅਤੇ ਜਵਾਨਾਂ ਵੱਲੋਂ ਸ਼ਾਨਦਾਰ ਪੇਸ਼ਕਾਰੀ ਕੀਤੀ ਗਈ। ਇਸ ਮੌਕੇ ਐੱਸਐੱਸਪੀ ਵੱਲੋਂ ਡੀਐੱਸਪੀ ਬੂਟਾ ਸਿੰਘ ਗਿੱਲ ਸਮੇਤ ਉਨ੍ਹਾਂ ਦੇ ਸਟਾਫ਼ ਦੇ ਵੱਖ-ਵੱਖ ਅਧਿਕਾਰੀ ਅਤੇ ਪ੍ਰਸ਼ਾਸਨਿਕ ਸਟਾਫ਼ ਵੀ ਹਾਜ਼ਰ ਰਹੇ। ਪੁਲੀਸ ਸਮਾਰਕ ਵਿਖੇ ਸਥਾਨਕ ਨਾਗਰਿਕਾਂ ਤੋਂ ਇਲਾਵਾ ਆਈਟੀਬੀਪੀ ਦੇ ਅਧਿਕਾਰੀ ਵੀ ਮੌਜੂਦ ਸਨ। ਇਸ ਮੌਕੇ ਡੀਐਸਪੀ ਬੂਟਾ ਸਿੰਘ ਗਿੱਲ ਕਿਹਾ ਕਿ ਆਜ਼ਾਦੀ ਕਾ ਅੰਮ੍ਰਿਤ ਮਹਾਂਉਤਸਵ ਪ੍ਰੋਗਰਾਮ ਤਹਿਤ ਆਈਟੀਬੀਪੀ ਵੱਲੋਂ ਪੁਲੀਸ ਯਾਦਗਾਰ ਪਟਿਆਲਾ ਵਿੱਚ ਬੈਂਡ ਦੀ ਪੇਸ਼ਕਾਰੀ ਕਰਕੇ ਦੇਸ਼ ਦੀ ਸੁਰੱਖਿਆ ਵਿੱਚ ਅਹਿਮ ਭੂਮਿਕਾ ਨਿਭਾਉਣ ਵਾਲੇ ਸ਼ਹੀਦਾਂ ਨੂੰ ਯਾਦ ਕੀਤਾ ਗਿਆ ਹੈ। ਇਸ ਦੌਰਾਨ ਆਈਟੀਬੀਪੀ ਦੇ ਡਿਪਟੀ ਫਾਈਟਰ ਸਤਵਿੰਦਰ ਸਿੰਘ ਨੇ ਵੀ ਸੰਬੋਧਨ ਕੀਤਾ। ਇਸੇ ਲੜੀ ਤਹਿਤ ਆਈਟੀਬੀਪੀ ਦੀ ਚੌਰਾ ਕੈਂਪਸ ਵਿੱਚ ਆਈਟੀਬੀਪੀ ਸਿਖਲਾਈ ਸ਼ਾਖਾ ਵੱਲੋਂ ਸਕੂਲੀ ਬੱਚਿਆਂ ਲਈ ਹਥਿਆਰਾਂ ਦੀ ਪ੍ਰਦਰਸ਼ਨੀ ਵੀ ਲਗਾਈ ਗਈ ਅਤੇ ਬੱਚਿਆਂ ਨੂੰ ਕੈਂਪਸ ਵਿੱਚ ਵੀ ਲਿਜਾਇਆ ਗਿਆ।
