ਸ਼ੂਟਿੰਗ: ਰਾਜਸਥਾਨ ਦੀ ਦਰਸ਼ਨਾਂ ਨੇ ਸੋਨ ਤਗਮਾ ਜਿੱਤਿਆ

ਪਟਿਆਲਾ: 64ਵੀਂ ਕੌਮੀ ਸ਼ੂਟਿੰਗ ਚੈਂਪੀਅਨਸ਼ਿਪ ਕੰਪੀਟੀਸ਼ਨ-ਸ਼ੌਟਗੰਨ 2021 ਵਿਚ ਅੱਜ ਸਕੀਟ ਈਵੇਂਟ ਵਿਚ ਸੀਨੀਅਰ ਅਤੇ ਜੂਨੀਅਰ ਮਹਿਲਾ ਵਰਗ ਦੇ ਮੁਕਾਬਲੇ ਹੋਏ। ਜੂਨੀਅਰ ਮੁਕਾਬਲਿਆਂ ’ਚ ਗਨੇਮਤ ਸੇਖੋਂ ਪੰਜਾਬ ਨੇ 125 ਅੰਕਾਂ ’ਚੋਂ 117 ਅੰਕ ਹਾਸਲ ਕਰ ਕੇ ਪਹਿਲੇ ਨੰਬਰ ਦੀ ਪੁਜ਼ੀਸ਼ਨ ਹਾਸਲ ਕੀਤੀ। ਪਰ ਪਹਿਲੇ ਸਥਾਨ ’ਤੇ ਰਾਜਸਥਾਨ ਦੀ ਦਰਸ਼ਨਾਂ ਰਾਠੌਰ ਰਹੀ ਜਿਸ ਨੇ ਗੋਲਡ ਮੈਡਲ ਜਿੱਤਿਆ। ਅਰੀਬਾ ਖ਼ਾਨ ਉੱਤਰ 116 ਅੰਕ ਲਏ, ਦਰਸ਼ਨ ਰਾਠੌਰ ਰਾਜਸਥਾਨ ਨੇ 113, ਕਾਰਤੀਕੀ ਸ਼ਾਕਤਾਵਤ ਰਾਜਸਥਾਨ ਨੇ 113, ਜਸਮੀਨ ਕੌਰ ਪੰਜਾਬ ਨੇ 110, ਰਿਆਜ਼ਾ ਢਿੱਲੋਂ ਹਰਿਆਣਾ ਨੇ 110 ਅੰਕ ਹਾਸਲ ਕੀਤੇ। ਫਾਈਨਲ ਹੋਣ ਤੋਂ ਬਾਅਦ ਰੈਂਕਿੰਗ ਵਿਚ ਦਰਸ਼ਨਾਂ ਰਾਠੌਰ ਨੇ ਸੋਨ ਤਗਮਾ ਜਿੱਤਿਆ। ਗਨੇਮਤ ਸੇਖੋਂ ਨੇ ਸਿਲਵਰ ਤੇ ਰਿਆਜ਼ਾ ਢਿੱਲੋਂ ਹਰਿਆਣਾ ਨੇ ਕਾਂਸੇ ਦਾ ਤਗਮਾ ਜਿੱਤਿਆ। ਸੀਨੀਅਰ ਮਹਿਲਾ ਟੀਮ ਮੁਕਾਬਲੇ ਵਿਚ ਪੰਜਾਬ ਟੀਮ- ਗਨੇਮਤ ਸੇਖੋਂ, ਅਸੀਸ ਛੀਨਾ ਤੇ ਪਰੀ ਨਾਜ਼ ਧਾਲੀਵਾਲ ਨੇ 375 ’ਚੋਂ 330 ਅੰਕ ਹਾਸਲ ਕਰ ਕੇ ਸੋਨ ਤਗਮਾ ਜਿੱਤਿਆ। ਰਾਜਸਥਾਨ ਟੀਮ- ਦਰਸ਼ਨਾਂ ਰਾਠੌਰ, ਮਹੇਸ਼ਵਰੀ ਚੌਹਾਨ ਤੇ ਸੰਭਾਵੀ ਕੁਮਾਰੀ ਨੇ 314 ਅੰਕ ਹਾਸਲ ਕਰੇ ਦੂਜਾ ਸਥਾਨ ਲਿਆ। -ਪੱਤਰ ਪ੍ਰੇਰਕ