ਪੱਤਰ ਪ੍ਰੇਰਕ
ਘਨੌਰ, 6 ਮਈ
ਬਾਬਾ ਬੰਦਾ ਸਿੰਘ ਬਹਾਦਰ ਮਾਰਗ ’ਤੇ ਪੈਂਦੇ ਪਿੰਡ ਰਾਜਗੜ੍ਹ ਦੇ ਪੈਟਰੋਲ ਪੰਪ ’ਤੇ ਖੜ੍ਹੇ ਕੰਟੇਨਰ ਵਿੱਚੋਂ 20 ਬੈਟਰੀਆਂ ਚੋਰੀ ਹੋ ਗਈਆਂ। ਸ਼ੰਭੂ ਪੁਲੀਸ ਨੇ ਦੱਸਿਆ ਕਿ ਰਾਮੇਸ਼ਵਰ ਨਾਥ ਵਾਸੀ ਪਿੰਡ ਜੋਧ ਦਾਸ ਜ਼ਿਲ੍ਹਾ ਗੇਲੂਆੜਾ ਰਾਜਸਥਾਨ ਨੇ ਪੁਲੀਸ ਕੋਲ ਸ਼ਿਕਾਇਤ ਦਰਜ ਕਰਵਾਈ ਹੈ ਕਿ ਉਹ ਕੰਟੇਨਰ ’ਤੇ ਡਰਾਈਵਰੀ ਕਰਦਾ ਹੈ ਅਤੇ ਕੁਝ ਦਿਨ ਪਹਿਲਾਂ ਲੀਯੂਮੀਨਸ ਪਾਵਰ ਟੈਕਨੋਲਜੀ ਦੇ ਬਪਰੌਰ ਸਥਿਤ ਗੁਦਾਮ ਤੋਂ ਕੰਟੇਨਰ ਵਿੱਚ 600 ਬੈਟਰੀਆਂ ਲੋਡ ਕਰ ਕੇ ਮੁੰਬਈ ਲਈ ਰਵਾਨਾ ਹੋਇਆ। ਜਦੋਂ ਉਹ ਪਿੰਡ ਰਾਜਗੜ੍ਹ ਦੇ ਯੁਵਰਾਜ ਫੀਲਿੰਗ ਸਟੇਸ਼ਨ ’ਤੇ ਗੱਡੀ ਵਿੱਚ ਤੇਲ ਪੁਆਉਣ ਗਿਆ ਤਾਂ ਉੱਥੇ ਤੇਲ ਨਾ ਹੋਣ ਕਾਰਨ ਉਹ ਕੰਟੇਨਰ ਨੂੰ ਪੈਟਰੋਲ ਪੰਪ ’ਤੇ ਖੜ੍ਹਾ ਕਰ ਕੇ ਆਪ ਸੌਂ ਗਿਆ। ਜਦੋਂ ਉਸ ਨੇ ਸਵੇਰੇ ਉਠ ਕੇ ਵੇਖਿਆ ਤਾਂ ਕੰਟੇਨਰ ਵਿੱਚੋਂ 20 ਬੈਟਰੀਆਂ ਗਾਇਬ ਸਨ। ਪੁਲੀਸ ਨੇ ਅਣਪਛਾਤੇ ਵਿਅਕਤੀਆਂ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ।
