ਪੱਤਰ ਪ੍ਰੇਰਕ
ਨੂਰਪੁਰ ਬੇਦੀ, 10 ਨਵੰਬਰ
ਇੱਥੋਂ ਨੇੜਲੇ ਪਿੰਡ ਕੀਮਾ ਬਾਸ ਵਿੱਚ ਇੱਕ ਨੌਜਵਾਨ ਨੇ ਤੇਜ਼ਧਾਰ ਹਥਿਆਰ ਨਾਲ ਹਮਲਾ ਕਰ ਕੇ ਇੱਕ ਵਿਅਕਤੀ ਨੂੰ ਕਤਲ ਕਰ ਦਿੱਤਾ। ਇਹ ਝਗੜਾ ਸ਼ਰਾਬ ਪੀਣ ਤੋਂ ਰੋਕਣ ਤੋਂ ਹੋਇਆ। ਮ੍ਰਿਤਕ ਦੀ ਪਛਾਣ ਰੋਸ਼ਨ ਲਾਲ ਵਜੋਂ ਹੋਈ ਹੈ। ਰੋਸ਼ਨ ਲਾਲ ਦੀ ਲੜਕੀ ਨੇ ਕਿਹਾ ਕਿ ਰਾਤ 11 ਵਜੇ ਉਨ੍ਹਾਂ ਦੇ ਘਰ ਅੱਗੇ ਉਸ ਦੇ ਚਾਚੇ ਦਾ ਲੜਕਾ ਲਖਵਿੰਦਰ ਸਿੰਘ ਗਾਲਾਂ ਕੱਢ ਰਿਹਾ ਸੀ। ਉਸ ਨੇ ਆਪਣੇ ਹੱਥ ਵਿੱਚ ਕ੍ਰਿਪਾਨ ਫੜੀ ਹੋਈ ਸੀ। ਲਖਵਿੰਦਰ ਸਿੰਘ ਨਾਲ ਉਸ ਦੀ ਮਾਤਾ ਨਛੱਤਰ ਕੌਰ ਅਤੇ ਭੈਣ ਅਮਰਜੀਤ ਕੌਰ ਵੀ ਸਨ। ਰੋਸ਼ਨ ਲਾਲ ਜਦੋਂ ਬਾਹਰ ਨਿਕਲਿਆਂ ਤਾਂ ਲਖਵਿੰਦਰ ਨੇ ਕ੍ਰਿਪਾਨ ਨਾਲ ਉਸ ’ਤੇ ਹਮਲਾ ਕਰ ਦਿੱਤਾ। ਉਸ ਦੀ ਮਾਤਾ ਅਤੇ ਭੈਣ ਨੇ ਪੱੱਥਰਾਂ ਨਾਲ ਹਮਲਾ ਕਰ ਦਿੱਤਾ ਜਿਸ ਨਾਲ ਰੋਸ਼ਨ ਲਾਲ ਦੀ ਲੜਕੀ ਹਰਜੀਤ ਕੌਰ ਵੀ ਜ਼ਖ਼ਮੀ ਹੋ ਗਈ। ਜ਼ਖ਼ਮੀ ਹੋਏ ਰੋਸ਼ਨ ਨੇ ਦਮ ਤੋੜ ਦਿੱਤਾ। ਪੁਲੀਸ ਨੇ ਲਖਵਿੰਦਰ ਸਿੰਘ, ਨਛੱਤਰ ਕੌਰ ਅਤੇ ਅਮਰਜੀਤ ਕੌਰ ਵਿਰੁੱਧ ਕੇਸ ਦਰਜ ਕੀਤਾ ਹੈ।
