ਨਿੱਜੀ ਪੱਤਰ ਪ੍ਰੇਰਕ
ਚਮਕੌਰ ਸਾਹਿਬ, 9 ਸਤੰਬਰ
ਕਸਬਾ ਬੇਲਾ ਵਿੱਚ ਗ੍ਰਾਮ ਪੰਚਾਇਤ ਵੱਲੋਂ ਗੁੱਗਾ ਜਾਹਰ ਪੀਰ ਦੀ ਯਾਦ ਵਿੱਚ ਨਗਰ ਵਾਸੀਆਂ ਅਤੇ ਐਨਆਰਆਈ ਭਰਾਵਾਂ ਦੇ ਸਹਿਯੋਗ ਨਾਲ ਕਰਵਾਏ ਕੁਸ਼ਤੀ ਦੰਗਲ ਦਾ ਉਦਘਾਟਨ ਮਾਰਕਫੈੱਡ ਦੇ ਡਾਇਰੈਕਟਰ ਗਿਆਨ ਸਿੰਘ ਬੇਲਾ ਨੇ ਕੀਤਾ। ਸਰਪੰਚ ਲਖਵਿੰਦਰ ਸਿੰਘ ਭੂਰਾ ਨੇ ਦੱਸਿਆ ਕਿ ਝੰਡੀ ਦੀ ਕੁਸ਼ਤੀ ਪਹਿਲਵਾਨ ਜਤਿੰਦਰ ਪਥਰੇੜੀਆਂ ਨੇ ਰੋਹਿਤ ਹਰਿਆਣਾ ਨੂੰ ਚਿੱਤ ਕਰਕੇ ਜਿੱਤੀ। ਦੋ ਨੰਬਰ ਦੀ ਕੁਸ਼ਤੀ ਗੋਲਡੀ ਚਮਕੌਰ ਸਾਹਿਬ ਨੇ ਕਰਮਾ ਪਟਿਆਲਾ ਨੂੰ ਹਰਾ ਕੇ ਜਿੱਤੀ । ਸਪੈਸ਼ਲ ਕੁਸ਼ਤੀਆਂ ਦੌਰਾਨ ਸੋਨ ਤਗਮਾ ਜੇਤੂ ਬੇਲਾ ਕਾਲਜ ਦੇ ਵਿਦਿਆਰਥੀ ਗੁਰਜੀਤ ਮਗਰੋੜ ਅਤੇ ਦਿਲਜੀਤ ਜਟਾਣਾ ਵੀ ਜੇਤੂ ਰਹੇ। ਦੰਗਲ ਵਿੱਚ 80 ਦੇ ਕਰੀਬ ਪਹਿਲਵਾਨਾਂ ਨੇ ਆਪਣੇ ਜੌਹਰ ਵਿਖਾਏ।ਕੁਸ਼ਤੀ ਦੰਗਲ ਤੋਂ ਪਹਿਲਾਂ ਸਵੇਰ ਸੱਭਿਆਚਾਰਕ ਪ੍ਰੋਗਰਾਮ ਦੌਰਾਨ ਰੀਨਾ ਨਾਫਰੀ ਨੇ ਜੁਗਣੀ, ਮਗਰੋਂ ਗਾਇਕ ਜੋੜੀ ਸੁਰਿੰਦਰ ਮਾਨ ਤੇ ਕਰਮਜੀਤ ਕੰਮੋ ਨੇ ਆਪਣੇ ਗੀਤਾਂ ਰਾਹੀਂ ਲੋਕਾਂ ਦਾ ਮਨੋਰੰਜਨ ਕੀਤਾ । ਇਸ ਮੌਕੇ ਸ਼੍ਰੋਮਣੀ ਅਕਾਲੀ ਦਲ ਦੇ ਸਰਕਲ ਪ੍ਰਧਾਨ ਅਮਨਦੀਪ ਸਿੰਘ ਮਾਂਗਟ, ਐਡਵੋਕੇਟ ਆਰਐੱਨ ਮੋਦਗਿੱਲ, ਰਮਨਦੀਪ ਸਿੰਘ, ਪੰਚ ਰਵਿੰਦਰ ਸਰਮਾ, ਸਰਪੰਚ ਅਮਰ ਸਿੰਘ ਹਾਜ਼ਰ ਸਨ ।
ਗਗਨ ਮਾਨ ਨੇ ਕਰਵਾਈ ਪਹਿਲਵਾਨਾਂ ਦੀ ਹੱਥਜੋੜੀ
ਮੁੱਲਾਂਪੁਰ ਗਰੀਬਦਾਸ (ਪੱਤਰ ਪ੍ਰੇਰਕ): ਪਿੰਡ ਤੋਗਾਂ ਵਿੱਚ ਗੁੱਗਾ ਜ਼ਾਹਰ ਪੀਰ ਦੇ ਮੇਲੇ ਮੌਕੇ ਸਥਾਨਕ ਕਮੇਟੀ ਵੱਲੋਂ ਕਰਵਾਏ 51ਵੇਂ ਕੁਸ਼ਤੀ ਦੰਗਲ ਦੌਰਾਨ ਪਹਿਲੀ ਝੰਡੀ ਦੀ ਕੁਸ਼ਤੀ ਪਹਿਲਵਾਨ ਮੁਨੀਸ਼ ਡੂਮਛੇੜੀ ਤੇ ਰੋਬਿਨ ਕੁਹਾਲੀ ਵਿਚਕਾਰ ਬਰਾਬਰ ਰਹੀ। ਦੂੂਜੀ ਝੰਡੀ ਵਿੱਚ ਇਰਾਨ ਮੁੱਲਾਂਪੁਰ ਗਰੀਬਦਾਸ ਤੇ ਮਾਨੀ ਰੌਣੀ ਵੀ ਬਰਾਬਰ ਰਹੇ। ਪ੍ਰਬੰਧਕਾਂ ਰਵੀ ਰਾਣਾ, ਪ੍ਰਦੀਪ, ਸ਼ਿਵ ਕੁਮਾਰ ਨੇ ਦੱਸਿਆ ਕਿ ਪਹਿਲਵਾਨ ਮੱਖਣ ਕੈਂਬਾਲਾ ਨੇ ਰਵੀ ਪੰਡਿਤ ਰਾਈਏਵਾਲ ਨੂੰ, ਵਿਸ਼ੂ ਚੰਡੀਗੜ੍ਹ ਨੇ ਸੁਖਰਾਜ ਕੁਹਾਲੀ ਨੂੰ, ਅਖਲੇਸ਼ ਡੂਮਛੇੜੀ ਨੇ ਰਾਜਾ ਮੁੱਲਾਂਪੁਰ ਨੂੰ ਚਿੱਤ ਕੀਤਾ। ਇਸ ਮੌਕੇ ਮੁੱਖ ਮਹਿਮਾਨ ਵਜੋਂ ਕੈਬਨਿਟ ਮੰਤਰੀ ਬੀਬਾ ਅਨਮੋਲ ਗਗਨ ਮਾਨ ਨੇ ਸ਼ਿਰਕਤ ਕਰਦਿਆਂ ਪ੍ਰਬੰਧਕਾਂ ਨੂੰ ਆਪਣੇ ਅਖਤਿਆਰੀ ਕੋਟੇ ਵਿੱਚੋਂ ਇੱਕ ਲੱਖ ਰੁਪਏ ਦੀ ਗਰਾਂਟ ਅਤੇ ਪਿੰਡ ਵਿੱਚ ਪੀਣ ਵਾਲੇ ਪਾਣੀ ਦੇ ਟਿਊਬਵੈਲ ਸਮੇਤ ਸੀਵਰੇਜ ਸਿਸਟਮ ਦਾ ਪ੍ਰਬੰਧ ਕਰਵਾਉਣ ਦਾ ਐਲਾਨ ਕੀਤਾ।
