ਪੱਤਰ ਪ੍ਰੇਰਕ
ਮੁਕੇਰੀਆਂ, 23 ਜੂਨ
ਕਸਬਾ ਜੰਡਵਾਲ ਦੇ ਨੇੜਲੇ ਪਿੰਡ ਠਾਕੁਰਦੁਆਰਾ ਦੇ ਸੀਆਰਪੀਐੱਫ ਵਿੱਚ ਤਾਇਨਾਤ ਹੈੱਡ ਕਾਂਸਟੇਬਲ ਮਨੋਜ ਕੁਮਾਰ ਜੋ ਕਿ ਡਿਊਟੀ ਦੌਰਾਨ ਦਿਲ ਦਾ ਦੌਰਾ ਪੈਣ ਕਾਰਨ ਦਮ ਤੋੜ ਗਿਆ ਸੀ, ਦਾ ਅੱਜ ਅੰਤਿਮ ਸੰਸਕਾਰ ਉਸ ਦੇ ਜੱਦੀ ਪਿੰਡ ਸਰਕਾਰੀ ਸਨਮਾਨਾਂ ਨਾਲ ਕੀਤਾ ਗਿਆ। ਸ਼ਹੀਦ ਦੀ ਚਿਤਾ ਨੂੰ ਅਗਨੀ ਉਸ ਦੇ ਦੋ ਪੁੱਤਰਾਂ ਨੇ ਦਿਖਾਈ। ਸ਼ਹੀਦ ਦੇ ਪਿਤਾ ਰਾਮ ਲਾਲ ਨੇ ਦੱਸਿਆ ਕਿ ਮਨੋਜ ਕੁਮਾਰ ਸੀਆਰਪੀਐੱਫ ਦੀ 173 ਬੀਐੱਲ ਬਟਾਲੀਅਨ ਵਿੱਚ ਬਤੌਰ ਹੈਡ ਕਾਂਸਟੇਬਲ ਸਿਲੀਗੁੜੀ ਵਿਖੇ ਤਾਇਨਾਤ ਸੀ। ਉਹ ਕਰੀਬ ਪਿਛਲੇ 20 ਸਾਲਾਂ ਤੋਂ ਸੀਆਰਪੀਐੱਫ ਵਿੱਚ ਆਪਣੀ ਡਿਊਟੀ ਨਿਭਾ ਰਿਹਾ ਸੀ। ਸ਼ਹੀਦ ਦੀ ਪਤਨੀ ਨੇ ਦੱਸਿਆ ਕਿ 22 ਜੂਨ ਨੂੰ ਕਰੀਬ ਸਵੇਰੇ 9 ਵਜੇ ਮਨੋਜ ਨੇ ਆਪਣੀ ਸਿਹਤ ਠੀਕ ਨਾ ਹੋਣ ਬਾਰੇ ਫੋਨ ਕੀਤਾ ਸੀ।