ਨਿੱਜੀ ਪੱਤਰ ਪ੍ਰੇਰਕ
ਪਟਿਆਲਾ, 18 ਜੂਨ
ਪੰਜਾਬੀ ਯੂਨੀਵਰਸਿਟੀ, ਪਟਿਆਲਾ ਦੇ ਵਾਈਸ ਚਾਂਸਲਰ ਡਾ. ਬੀਐੱਸ ਘੁੰਮਣ ਵੱਲੋਂ ਇਕ ਅਹਿਮ ਨਿਯੁਕਤੀ ਕਰਦਿਆਂ ਡਾ. ਜਸਬੀਰਇੰਦਰ ਸਿੰਘ ਖੱਟੜ ਨੂੰ ਅਗਲੇ ਆਦੇਸ਼ਾਂ ਤਕ ਕੰਟਰੋਲਰ ਪ੍ਰੀਖਿਆਵਾਂ ਨਿਯੁਕਤ ਕੀਤਾ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਡਾ. ਖੱਟੜ ਬਾਟਨੀ ਵਿਭਾਗ ਦੇ ਸੀਨੀਅਰ ਅਧਿਆਪਕ ਹੋਣ ਦੇ ਨਾਲ ਲਾਈਫ਼ ਸਾਇੰਸਜ਼ ਫੈਕਲਟੀ ਦੇ ਡੀਨ ਵਜੋਂ ਵੀ ਸੇਵਾਵਾਂ ਦੇ ਰਹੇ ਹਨ। ਉਹ ਕੰਟਰੋਲਰ ਵਜੋਂ ਡਾ. ਕੰਵਲਜੀਤ ਸਿੰਘ ਦੀ ਥਾਂ ਲੈਣਗੇ। ਵਾਈਸ ਚਾਂਸਲਰ ਡਾ. ਘੁੰਮਣ ਨੇ ਕਿਹਾ ਕਿ ਪ੍ਰੀਖਿਆ ਸ਼ਾਖਾ ਦੇ ਕੰਟਰੋਲਰ ਵਜੋਂ ਕਾਰਜ ਕਰਨਾ ਇਕ ਜ਼ਿੰਮੇਵਾਰੀ ਅਤੇ ਸਿਰੜ ਵਾਲਾ ਕਾਰਜ ਹੈ। ਕੋਵਿਡ-19 ਦੇ ਇਸ ਦੌਰ ਵਿਚ ਪ੍ਰੀਖਿਆ ਸ਼ਾਖਾ ਦੇ ਸਾਹਮਣੇ ਹੋਰ ਵੀ ਬਹੁਤ ਸਾਰੀਆਂ ਚੁਨੌਤੀਆਂ ਹਨ ਜਿਨ੍ਹਾਂ ਸਬੰਧੀ ਆਸ ਕਰਦੇ ਹਾਂ ਕਿ ਡਾ. ਖੱਟੜ ਜਿਹੇ ਮਿਹਨਤੀ ਕੰਟਰੋਲਰ ਦੀ ਅਗਵਾਈ ਹੇਠ ਚੰਗੇ ਨਤੀਜੇ ਆਊਣਗੇ। ਡੀਨ ਅਕਾਦਮਿਕ ਮਾਮਲੇ ਡਾ. ਗੁਰਦੀਪ ਸਿੰਘ ਬਤਰਾ, ਜੋ ਡਾ. ਖੱਟੜ ਦੇ ਅਹੁਦਾ ਸੰਭਾਲਣ ਵੇਲੇ ਉਚੇਚੇ ਤੌਰ ’ਤੇ ਪਹੁੰਚੇ, ਨੇ ਕਿਹਾ ਕਿ ਡਾ. ਖੱਟੜ ਦਾ ਅਧਿਆਪਨ, ਖੋਜ ਅਤੇ ਪ੍ਰਬੰਧਨ ਸਬੰਧੀ ਲੰਬਾ ਤਜਰਬਾ ਹੈ ਜਿਸ ਦਾ ਭਰਪੂਰ ਲਾਭ ਇਸ ਅਹੁਦੇ ਰਾਹੀਂ ਪੰਜਾਬੀ ਯੂਨੀਵਰਸਿਟੀ ਨੂੰ ਪ੍ਰਾਪਤ ਹੋਵੇਗਾ। ਇਸ ਮੌਕੇ ਰਜਿਸਟਰਾਰ ਡਾ. ਮਨਜੀਤ ਸਿੰਘ ਨਿੱਜਰ, ਡੀਨ ਕਾਲਜਿਜ਼ ਡਾ. ਯੋਗਰਾਜ, ਓਐੱਸਡੀ ਟੂ ਵਾਈਸ ਚਾਂਸਲਰ ਡਾ. ਐੱਨ ਐੱਸ ਅੱਤਰੀ, ਡਾਇਰੈਕਟਰ ਮਨੁੱਖੀ ਸਰੋਤ ਵਿਕਾਸ ਕੇਂਦਰ ਡਾ. ਮਨਰੁਚੀ ਕੌਰ ਵਿਸ਼ੇਸ਼ ਤੌਰ ’ਤੇ ਹਾਜ਼ਰ ਸਨ।
