ਪੱਤਰ ਪ੍ਰੇਰਕ
ਮਾਛੀਵਾੜਾ, 24 ਸਤੰਬਰ
ਪਿੰਡ ਉਧੋਵਾਲ ਕਲਾਂ ਵਿੱਚ ਬੀਤੀ ਰਾਤ ਛੇ ਨਕਾਬਪੋਸ਼ ਨੌਜਵਾਨ ਕਿਸਾਨ ਅਜੀਤ ਸਿੰਘ ਦੇ ਘਰ ਵਿੱਚ ਦਾਖ਼ਲ ਹੋ ਕੇ ਉਸ ਦੀ ਕੁੱਟਮਾਰ ਕਰਨ ਮਗਰੋਂ ਤੀਹ ਹਜ਼ਾਰ ਰੁਪਏ ਲੈ ਗਏ। ਜਾਣਕਾਰੀ ਅਨੁਸਾਰ ਉਕਤ ਨਕਾਬਪੋਸ਼ਾਂ ਨੇ ਘਰ ਵਿੱਚ ਵੜ ਕੇ ਪਹਿਲਾਂ ਅਜੀਤ ਸਿੰਘ ਦੇ ਨੌਕਰ ਰਾਜੂ ਰਾਮ ਨੂੰ ਬੰਨ੍ਹ ਦਿੱਤਾ ਅਤੇ ਫਿਰ ਅਜੀਤ ਸਿੰਘ ਦੀ ਕੁੱਟਮਾਰ ਕੀਤੀ। ਰਾਜੂ ਰਾਮ ਨੇ ਪੁਲੀਸ ਨੂੰ ਦੱਸਿਆ ਕਿ ਬੀਤੀ ਰਾਤ ਉਹ ਪਸ਼ੂਆਂ ਵਾਲੇ ਵਾੜੇ ਵਿੱਚ ਤੇ ਅਜੀਤ ਸਿੰਘ ਅੰਦਰ ਕਮਰੇ ਵਿੱਚ ਸੁੱਤਾ ਪਿਆ ਸੀ। ਅੱਧੀ ਰਾਤ ਨੂੰ ਛੇ ਹਥਿਆਰਬੰਦ ਨਕਾਬਪੋਸ਼ ਘਰ ਦੀ ਕੰਧ ਟੱਪ ਕੇ ਅੰਦਰ ਆਏ। ਉਨ੍ਹਾਂ ਪਰਨੇ ਨਾਲ ਉਸ ਦੇ ਮੂੰਹ ਤੇ ਹੱਥ-ਪੈਰ ਬੰਨ੍ਹ ਦਿੱਤੇ ਤੇ ਇੱਕ ਨੌਜਵਾਨ ਡੰਡਾ ਲੈ ਕੇ ਉਸ ਕੋਲ ਖੜ੍ਹ ਗਿਆ। ਬਾਕੀ ਪੰਜ ਨੌਜਵਾਨ ਅਜੀਤ ਸਿੰਘ ਨੂੰ ਚੱਕ ਕੇ ਰਸੋਈ ਵਿੱਚ ਲੈ ਗਏ, ਜਿਥੇ ਉਨ੍ਹਾਂ ਉਸ ਦੀ ਕੁੱਟਮਾਰ ਕੀਤੀ। ਫਿਰ ਉਨ੍ਹਾਂ ਨੇ ਸਾਮਾਨ ਦੀ ਫਰੋਲਾ ਫਰਾਲੀ ਕੀਤੀ ਤੇ 30 ਹਜ਼ਾਰ ਰੁਪਏ ਲੈ ਗਏ।
