ਪੱਤਰ ਪ੍ਰੇਰਕ
ਤਰਨ ਤਾਰਨ, 25 ਅਕਤੂਬਰ
ਸਰਹੱਦੀ ਖੇਤਰ ਦੇ ਪਿੰਡ ਨੌਸ਼ਿਹਰਾ ਢਾਲਾ ਦੀ ਕੰਡਿਆਲੀ ਤਾਰ ਦੇ ਪਾਰੋਂ ਟਰੈਕਟਰ-ਟਰਾਲੀ ’ਤੇ ਝੋਨੇ ਦੀ ਜਿਣਸ ਲੈਣ ਗਏ ਕਿਸਾਨ ਗੁਰਪਾਲ ਸਿੰਘ ਨੂੰ ਬੀਐੱਸਐੱਫ ਨੇ ਅੱਜ 3.166 ਕਿਲੋ ਹੈਰੋਇਨ ਅਤੇ ਦੋ ਪਿਸਤੌਲਾਂ ਸਮੇਤ ਕਾਬੂ ਕੀਤਾ ਹੈ। ਪੁਲੀਸ ਅਧਿਕਾਰੀ ਨੇ ਦੱਸਿਆ ਕਿ ਨੌਸ਼ਹਿਰਾ ਢਾਲਾ ਦਾ ਕਿਸਾਨ ਗੁਰਪਾਲ ਸਿੰਘ ਆਪਣੇ ਟਰੈਕਟਰ-ਟਰਾਲੀ ’ਤੇ ਕੰਡਿਆਲੀ ਤਾਰ ਦੇ ਪਾਰੋਂ ਝੋਨੇ ਦੀ ਜਿਣਸ ਲੈਣ ਗਿਆ ਸੀ। ਉਨ੍ਹਾਂ ਕਿਹਾ ਕਿ ਬੀਐੱਸਐੱਫ ਨੂੰ ਇਸ ਦੀ ਪਹਿਲਾਂ ਹੀ ਜਾਣਕਾਰੀ ਸੀ ਕਿ ਉਸ ਥਾਂ ’ਤੇ ਪਾਕਿਸਤਾਨ ਵਾਲੇ ਪਾਸਿਓਂ ਹੈਰੋਇਨ ਸੁੱਟੀ ਗਈ ਹੈ। ਜਿਵੇਂ ਹੀ ਕਿਸਾਨ ਨੇ ਆਪਣੀ ਜਿਣਸ ਨਾਲ ਹੈਰੋਇਨ ਅਤੇ ਪਿਸਤੌਲ ਆਪਣੇ ਟਰੈਕਟਰ ਵਿੱਚ ਸੁੱਟਿਆ ਤਾਂ ਬੀਐੱਸਐੱਫ ਦੀ ਟੀਮ ਨੇ ਮੌਕੇ ’ਤੇ ਆ ਕੇ ਕਿਸਾਨ ਅਤੇ ਉਸ ਦੇ ਤਿੰਨ ਹੋਰ ਸਾਥੀਆਂ ਨੂੰ ਹੈਰੋਇਨ ਤੇ ਪਿਸਤੌਲਾਂ ਸਣੇ ਕਾਬੂ ਕਰ ਲਿਆ।
