ਪੱਤਰ ਪ੍ਰੇਰਕ
ਤਰਨ ਤਾਰਨ, 8 ਅਕਤੂਬਰ
ਇਥੇ ਦਰਬਾਰ ਸਾਹਿਬ ਦੇ ਅੰਦਰੋਂ ਐਤਵਾਰ ਸ਼ਾਮ ਵੇਲੇ ਸੰਗਤ ਨੇ ਔਰਤ ਨੂੰ ਕਾਬੂ ਕਰਕੇ ਪੁਲੀਸ ਦੇ ਹਵਾਲੇ ਕੀਤਾ| ਉਸ ਦੀ ਪਛਾਣ ਨਿੰਦੋ (45) ਵਾਸੀ ਦਿਉਗੜ੍ਹ (ਪਾਤੜਾਂ ਜ਼ਿਲ੍ਹਾ ਪਟਿਆਲਾ) ਵਜੋਂ ਹੋਈ। ਥਾਣਾ ਸਿਟੀ ਦੇ ਏਐੱਸਆਈ ਨਰਿੰਦਰ ਸਿੰਘ ਨੇ ਦੱਸਿਆ ਕਿ ਨਿੰਦੋ ਆਪਣੀਆਂ ਪੰਜ ਹੋਰਨਾਂ ਸਾਥਣ ਔਰਤਾਂ ਸਣੇ ਦਰਬਾਰ ਸਾਹਿਬ ਵਿੱਚ ਆਈ। ਇਸੇ ਦੌਰਾਨ ਨਿੰਦੋ ਨੇ ਆਪਣੇ ਨਾਲ ਜਾ ਰਹੀ ਸ਼ਰਧਾਲੂ ਔਰਤ ਇੰਦਰਜੀਤ ਕੌਰ ਵਾਸੀ ਮੁਹੱਲਾ ਗੁਰੂ ਕਾ ਖੂਹ ਦੀ ਗਲੀ ਮੰਗਲ ਸਿੰਘ ਵਾਲੀ ਦੀ ਖੱਬੀ ਬਾਂਹ ਵਿੱਚ ਪਾਈ ਦੋ ਤੋਲੇ ਸੋਨੇ ਦੀ ਚੂੜੀ ਕਟਰ ਨਾਲ ਕੱਟ ਲਈ| ਉਸ ਨੇ ਕਟਰ ਆਪਣੀ ਸਾਥਣ ਨੂੰ ਸੌਂਪ ਦਿੱਤਾ। ਇੰਦਰਜੀਤ ਕੌਰ ਨੇ ਨਿੰਦੋ ਨੂੰ ਕਾਬੂ ਕਰ ਲਿਆ| ਮੌਕੇ ’ਤੇ ਦਰਬਾਰ ਸਾਹਿਬ ਦੇ ਸੇਵਾਦਾਰਾਂ ਨੇ ਇੰਦਰਜੀਤ ਕੌਰ ਦੇ ਪਤੀ ਸਕੱਤਰ ਸਿੰਘ ਨੂੰ ਨਾਲ ਲੈ ਕੇ ਔਰਤ ਨੂੰ ਪੁਲੀਸ ਹਵਾਲੇ ਕਰ ਦਿੱਤਾ| ਏਐੱਸਆਈ ਨਰਿੰਦਰ ਸਿੰਘ ਨੇ ਦੱਸਿਆ ਕਿ ਇਸ ਸਬੰਧੀ ਕੇਸ ਦਰਜ ਕਰ ਲਿਆ ਹੈ।
